Ýkrainada qazaq jaýyngeri – Keńes odaǵynyń batyry Serikbai Mútkenovty eske alyp, rýhyna taǵzym etildi, dep habarlaidy "Ult aqparat" Elshilikke silteme jasap.
22 maýsym Ekinshi dúniejúzilik soǵysy kezinde qaza bolǵandardy Eske alý jáne aza tutý kúni Qazaqstan Respýblikasynyń Ýkrainadaǵy Tótenshe jáne Ókiletti elshisi Darhan Káletaev Ýkrainanyń Rezino aýylynda ornalasqan Keńes odaǵynyń batyry Seribai Mútkenovtiń eskertishine gúl shoqtaryn qoidy.
342-atqyshtar polkiniń komandiri Serikbai Mútkenov 1943 jyly qazan aiynda alǵashqylardyń biri bolyp Dnepr ózeninen ótip, jaý kúshterin joiýǵa qatysyp 1944 jyly 5 qańtarda Rezino mańyndaǵy shaiqasta qaza tapty.
Rezino turǵyndary aýyldy azat etý úshin qaza tapqan barlyq maidangerlerdiń jarqyn esteligin saqtaidy. Batyrlardyń esimderi aýyl ortalyǵyndaǵy obeliskide jáne áskeri dańq murajaiynyń stendterinde kórsetilgen. Solardyń biri qazaq batyry Serikbai Mútkenov. Sondai-aq onyń eskertkish taqtasy Rezino orta mektebiniń áskeri dańq bólmesinde de ornatylǵan.
