18 jeltoqsanda Ýkrainanyń joǵarǵy radasy depýtattardyń tiispeýshilik mártebesin joiý týraly zańdy ekinshi oqylymda maquldady. Jobaǵa 291 depýtat qoldap daýys berdi. Qujat 2020 jyldyń 1 qańtarynan bastap kúshine enedi.
Depýtattar bul zańdy 3 jeltoqsanda alǵashqy oqylymda qarap maquldaǵan. Biraq ekinshi oqylymǵa deiin zań jobasyna 101 túzetý engizýdi usynǵan. Olar usynǵan 32 túzetý tolyǵymen nemese jartylai qabyldanǵan.
Depýtattardyń tiispeýshilik mártebesin joiý - bul prezident Vladimir Zelenskii men onyń "Slýga naroda" partiiasynyń sailaýaldy kampaniiasy kezinde sailaýshylarǵa bergen negizgi ýádeleriniń biri. Prezidenttiń pikirinshe, bul zań jemqorlyq baby boiynsha kúdikke ilingen depýtattardyń ústinen tez qylmystyq is qozǵaýǵa múmkindik beredi.
"Evropeiskaia solidarnost", "Batkivshyna" jáne "Golos" fraktsiiasynan eshkim zań jobasyn qoldamady.
Zań Ýkraina Konstitýtsiiasynan "depýtattardyń tiispeýshiligine kepildik berý" jaily 80-bapty alyp tastaýǵa múmkindik beredi. Konstitýtsiiadan sonymen birge halyq depýtattary "Ýkrainanyń joǵarǵy radasynyń kelisiminsiz qylmystyq jaýapkershilikke tartylmaidy, ustalmaidy nemese qamalmaidy" degen bap alynady.
Bul zańǵa sáikes, zań buzǵan depýtattar týraly aqparatty sotqa deiingi tergep-tekserý boiynsha birińǵai reestrge bas prokýrordyń engizýine quqyǵy bar. Bas prokýror ustaýǵa da ruqsat beredi. Ýkrainanyń jemqorlyqpen kúres ortalyǵy sarapshylary bul bas prokýratýranyń "osy salada monopoliia jasaýyna múmkindik beredi", basqa vedomstvolar depýtatty para alǵan jerine ustasa da, tergeý bastai almaidy dep synaidy.
