20 mamyrda Ýkraina parlamentinde Vladimir Zelenskii halyqqa adal qyzmet etýge ant etip, el prezidenti qyzmetine kiristi. Ulyqtaý rásiminde sóilegen Zelenskii joǵarǵy radany (parlament) taratatynyn aitty.
Zelenskii Ýkraina konstitýtsiiasy men Injilge qolyn qoiyp, ant mátinin oqydy. Otyrysqa qatysýshylar prezident antyn túregep turyp tyńdady. Osydan keiin otyrysqa tóraǵalyq etken Joǵarǵy Rada tóraǵasy Andrei Parýbii Prezident Zelenskiidi Joǵarǵy Radadaǵy Ýkraina prezidentiniń ornyna jaiǵasýǵa shaqyrdy.
Inaýgýratsiiadan soń sóilegen Zelenskii Ýkrainadaǵy áleýmettik máselerge toqtaldy. Ol "Úkimet bizdiń máseleni sheshpeidi. Úkimettiń ózi - bizdiń máselemiz" degen tsitatany keltirip, "Parlamentte keleshek urpaqtyń qamyn oilaityndar ǵana otyrýy kerek" dedi.
Azattyq agenttiginiń jazýynsha, jańa perzident parlamentten depýtattardyń tiispeýshilik mártebesin alyp tastaýdy, Ýkraina qaýipsizdik qyzmetiniń basshysyn, qorǵanys ministri men bas prokýrordy qyzmetinen bosatýdy surady. Zelenskii depýtattarǵa "Bul úshin sizderge eki ai beriledi" dedi.
Ol Ýkrainanyń Eýropaǵa bet buratynyn aitty. "Eń basty maqsatym - Donbasstaǵy daýǵa núkte qoiý" dedi Zelenskii.
- Birigýimiz kerek. Sol kezde myqty bolamyz. Álemdegi barlyq ýkrainalyqqa aitarym - biz 65 millionbyz. Sizder bizge kereksizder, myqty da qýatty Ýkraina qurýǵa árbirińiz qajetsizder. Sizderge Ýkraina azamattyǵyn berýdi ýáde etemin. Bul - bizdiń ulttyq ideiamyz, - dedi prezident.
Zelenskii depýtattarǵa qarata "Kabinetterińizge meniń sýretimdi ilmeńizder. Prezident - minájat etetin tulǵa emes. Balalaryńyzdyń sýretin qoiyńyzdar. Qandai da bir sheshim qabyldamas buryn solardyń kózine qarańyzdar" dedi.
Prezidentti ulyqtaý rásimi tańǵy 10.00-de (Nur-Sultan ýaqytymen 13.00-de) bastaldy. Inaýgýratsiia óterden birer kún buryn parlamenttik koalitsiianyń tarap ketkeni belgili boldy. Bul Zelenskiidiń joǵarǵy radany taratyp, kezekten tys parlament sailaýyn ótkizý josparyna kedergi keltirýi múmkin.
Ulyqtaý rásimine Latviia, Litva, Estoniia, Grýziia men Vengriia prezidentteri, Chehiia senatynyń, Ázerbaijan parlamentiniń basshylary, Belarýs pen Armeniianyń premer-ministrleri, AQSh energetika ministri, Grýziia, Moldova, Polsha, Slovakiia men jalpy alǵanda elýden asa eldiń ókilderi keldi. Budan bólek syrttai sottalǵan Viktor Ianýkovichti eseptemegende Ýkrainanyń barlyq eks-prezidenti rada zalynda otyrdy.
Qazaqstan atynan inaýgýratsiiaǵa parlament senaty tóraǵasynyń orynbasary Bektas Beknazarov bardy.
Ýkrainada prezident sailaýynyń ekinshi kezeńi 21 sáýirde ótti. Jańa memleket basshysy retinde akter, shoýmen Vladimir Zelenskii sailanǵan. Qarsylasy Poroshenko jeńilgenin moiyndaǵanymen, keler sailaýǵa qatysatynyn málimdedi.
