Foto: 1Tv.ge
Ýkraina prezidenti keńsesiniń burynǵy basshysy Andrei Ermak otstavkadan soń jáne tintý júrgizilgennen keiin maidanǵa barýdy josparlap otyrǵanyn málimdedi, dep habarlaidy Ult.kz Unian agenttigine silteme jasap.
28 qarashada BAQ Andrii Ermaktyń úkimettik kvartalda úiinde tintý júrgizilgenin habarlaǵan edi. «Ýkrainskaia pravda» jazǵandai, tintýdi Ýkraina Ulttyq sybailas jemqorlyqqa qarsy biýrosy men Arnaiy sybailas jemqorlyqqa qarsy prokýratýra qyzmetkerleri júrgizgen.
Sol kúni-aq Ýkraina prezidenti Vladimir Zelenskii Ermakty qyzmetinen bosatty. Zelenskiidiń aitýynsha, Ermak otstavka týraly ótinish jazǵan jáne prezident keńsesin ózgerister kútip tur.
Endi Unian dereginshe, Ermak «maidanǵa baratynyn» málimdedi. BAQ onyń bul sózin otstavkaǵa ketkeninen birneshe saǵat ótken soń aitqanyn atap ótedi.
«Men maidanǵa attanamyn jáne kez kelgen qysymǵa daiynmyn. Men – adal, ar-uiaty bar adammyn. (...) Meni masqara etti, ári meniń ar-namysyma qorǵan bolmady, 2022 jylǵy 24 aqpannan beri Kievte júrgenime qaramastan. Sondyqtan Zelenskiige qiyndyq týdyrǵym kelmeidi – maidanǵa ketemin», – dep keltiredi basylym Ermaktyń sózin.
Sonymen qatar, basylym onyń endi bailanysqa shyǵa almaýy múmkin ekenin aldyn ala eskertkenin jazady. Alaida Ermak qashan jáne qandai formatta aldyńǵy shepke barýdy josparlap otyrǵanyn, sondai-aq Ýkraina Qarýly kúshterine qosyla ma, joq pa – naqtylaǵan joq.
Aita keteiik, 10 qarashada Ýkraina Sybailas jemqorlyqqa qarsy biýrosy energetika salasyndaǵy iri kólemdegi qarjy jymqyrý shemasyn áshkerelegenin jáne bul iske qatysty adamdardyń sóilesýleriniń aýdiojazbalaryn jariialaǵanyn habarlaǵan bolatyn.
