Resei áskerine qosymsha resýrs jetkizýge qiyndyq keltirý úshin ýkrain kúshteri Herson oblysyndaǵy Antonov kópirin atqylaǵan.
Ýkraina kúshteri ońtústikte Resei jaýlap alǵan jerlerdi qaitarý úshin qarymta shabýylǵa kóshti, dep habarlaidy Azattyq.
Bul ýaqytta Resei Ýkrainanyń ortalyq aimaqtary men astana mańyndaǵy aýdandardy atqylady. Degenmen Máskeýge shyǵystaǵy urystarda jaýynger jetpei jatqany málim boldy.
Ýkrain áskeriniń málimdeýinshe, áýe kúshteri Reseidiń Herson túbindegi bes bekinisi men qalaǵa jaqyn mańdaǵy taǵy bir bekinisine soqqy jasaǵan. Resei áskerin Herson túbinde qorshaýǵa alýdy kózdegen Kiev soǵys bastalǵaly beri eń iri qarymta shabýylyn júrgizip jatyr.
Keiingi aptalarda Ýkraina Batys jetkizgen zymyran keshenderin qoldandy. Sonyń kómegimen Dneprdegi úsh kópirge soqqy jasalyp, ózenniń batys jaǵyndaǵy reseilik áskerge kómek jetkizý qiyndady.
Máskeý anneksiialap alǵan Qyrymmen shekaralas Herson oblysyn Resei kúshteri 24 aqpanda soǵys bastalǵan kezde basyp alǵan.
Aita keteiik, 28 shildede Resei Ýkrainanyń ortalyq bóligindegi Kirovgrad oblysyn áýeden soqqylady. Sonyń saldarynan Kropivnitsk qalasynda bes adam opat bolyp, 26 adam jaralandy. Kiev túbindegi áskeri bazada 15 adam zardap shekti. Ýkrainanyń soltústik jáne ońtústik aimaqtary da áýeden atqylandy.
