1 sáýirden bastap Ýkraina men Resei dostyǵy týraly qujattyń kúshi joiyldy. Qujat merzimi 31 naýryzda ótip ketken. Ýkrainanyń joǵarǵy radasy 2018 jyly 6 jeltoqsanda kelisim merzimin uzartpaý týraly sheshim qabyldaǵan.
"Ýkraina men Resei Federatsiiasy arasyndaǵy dostyq, yntymaqtastyq jáne áriptestik jónindegi kelisimdi toqtatý týraly" zań byltyr jeltoqsanda maquldanǵan.
Sol kezde Kreml Ýkrainanyń bul sheshimin "aqylǵa qonymsyz" dep baǵalaǵan. Máskeý "Kievtiń kelisimnen shyǵýy Resei-Ýkraina qatynasy úshin ǵana emes, Ýkrainanyń ulttyq múddesine de úlken zardabyn tigizedi" dep sanaidy.
Ýkraina men Resei arasyndaǵy dostyq jáne yntymaqtastyq jónindegi kelisimge 1997 jyldyń 31 mamyrynda sol kezdegi eki el prezidenti Leonid Kýchma men Boris Eltsin qol qoiǵan. Kelisim on jylǵa (odan ári ózdiginen uzara beredi) arnalǵan.
Ol 1999 jyldyń 1 sáýirinen bastap kúshine engen. Kelisimde taraptardyń bir-biriniń "aýmaqtyq tutastyǵyn qurmettep, eki el arasyndaǵy myzǵymas shekarany moiyndaityny" aitylǵan. Qujatta sonymen birge eki eldiń ózara qarym-qatynasyn "ózara teńdik, shekaranyń beriktigi, daý-janjaldy beibit retteý jáne kúsh qoldanbaý printsipteri" negizinde quratyny kórsetilgen.
