Mariýpoldaǵy qiraǵan aýrýhana. 9 naýryz 2022 jyl.
Ýkrainanyń Donetsk oblysyndaǵy Mariýpol qalasynda balalar aýrýhanasy qiraǵan. Qala biligi jáne Ýkraina prezidenti Vladimir Zelenskii Resei azamattyq nysandy bombalady dep aiyptady, dep habarlaidy Azattyq.
Zelenskii jariialaǵan videoda ǵimarattyń qiraǵany kórinedi.
Soqqydan qansha adamnyń qaza bolǵany jáne jaralanǵany belgisiz. Ýkraina prezidentiniń sózine qaraǵanda, úiindi astynda adamdar qalýy múmkin.
"Resei áskeri perzenthanaǵa tikelei soqqy jasady. Adamdar úiindi astynda qaldy. Balalar úiindi astynda qaldy. Bul - aiýandyq!" dep jazdy Zelenskii.
Ol NATO elderin Ýkrainanyń áýe keńistigin "jabýǵa" (iaǵni, reseilik ushaqtar men zymyrandardy atyp túsirý) shaqyrdy. Buǵan deiin NATO bul jaǵdaidy onan saiyn ýshyqtyryp jiberýi múmkin dep Kiev usynysynan bas tartqan.
"Ýkrainskaia pravda" saitynyń jazýynsha, jarylys oshaǵy perzenthana men balalar bólimi arasyndaǵy aýmaq bolǵan.
Resei qorǵanys ministrligi oqiǵaǵa túsinikteme bermedi. Vedomstvo osyǵan deiin Resei áskeri turǵyn úiler men azamattyq nysandarǵa shabýyl jasamaidy dep málimdegen. Biraq turǵyn úiler men mektepterdiń, ózge de azamattyq nysandardyń qiraǵany jaily aiǵaqtar óte kóp. BUU málimetinshe, 24 aqpanda Resei Ýkrainaǵa basyp kirgeli beri 1424 beibit turǵyn qaza bolǵan.
