Ýkraina britandyq BBC aqparat agenttiginiń Máskeý anneksiialap alǵan Qyrymdaǵy eki qalany "Resei aýmaǵy" retinde kórsetkenine narazy boldy. Britandyq aqparat agenttiginiń Orys qyzmeti 23 qańtarda Reseidiń túrli aimaǵynda Kreml synshysy Aleksei Navalnyidy qoldap shyqqan turǵyndar narazylyǵyn kartaǵa túsirgen. Onda narazylyq Reseidiń 122 qalasyn qamtyǵany, arasynda Qyrymdaǵy Simferopol men Sevastopol de bar ekeni kórsetilgen.
BBC kartaǵa "Resei Qyrymdy 2014 jyly jaýlap aldy" degen túsinikteme qosyp qoiǵan. Biraq soǵan qaramastan Ýkraina syrtqy ister ministrliginiń resmi ókili Oleg Nikolenko BBC-diń Orys qyzmetin "reseilik úgit-nasihatty jarnamalamaýǵa" shaqyrdy.
"Sevastopol men Simferopol eshqashan da Resei qalalary bolǵan emes... Halyqaralyq quqyqtyń mańyzy bar" dep jazdy Nikolenko 24 qańtarda Twitter-de.
Máskeý 2014 jyldyń basynda Qyrym túbegin basyp alyp, birneshe aptadan soń Ýkrainanyń shyǵysynda reseishil separatisterdi qoldai bastaǵan. Qaqtyǵystan keminde 13 200 adam qaza bolǵan.
Qyrym Tatarlarynyń jetekshisi Refat Shýbarov Facebook jelisinde BBC-dyń Orys qyzmetin "sizder Reseige Qyrymdy basyp alýǵa kómekteskilerińiz kele me?" dep surady.
BBC ókilderi daýly kartaǵa bailanysty túsinikteme bermedi.
23 qańtarda Resei qalalarynda ondaǵan myń adam kóshege shyǵyp, Navalnyidyń qamalýyna narazylyq bildirgen. Navalnyi alty kún buryn Germaniiadan Máskeýge oralǵan bette áýejaida ustalyp, sot ony sot ótkenge deiin qamaǵan. Byltyr tamyz aiynda "Novichok" tobyna jatatyn qaýipti zatpen ýlanǵan Navalnyi esin jimaǵan kúii Germaniiaǵa emdeýge jiberilgen bolatyn. Sol jaqta esin jiyp, birneshe ai emdelgen oppozitsiialyq saiasatker sodan beri alǵash ret óz eline oralǵanda ustaldy.
