ۋكراينا بريتاندىق BBC اقپارات اگەنتتٸگٸنٸڭ مەسكەۋ اننەكسييالاپ العان قىرىمداعى ەكٸ قالانى "رەسەي اۋماعى" رەتٸندە كٶرسەتكەنٸنە نارازى بولدى. بريتاندىق اقپارات اگەنتتٸگٸنٸڭ ورىس قىزمەتٸ 23 قاڭتاردا رەسەيدٸڭ تٷرلٸ ايماعىندا كرەمل سىنشىسى الەكسەي ناۆالنىيدى قولداپ شىققان تۇرعىندار نارازىلىعىن كارتاعا تٷسٸرگەن. وندا نارازىلىق رەسەيدٸڭ 122 قالاسىن قامتىعانى, اراسىندا قىرىمداعى سيمفەروپول مەن سەۆاستوپول دە بار ەكەنٸ كٶرسەتٸلگەن.
BBC كارتاعا "رەسەي قىرىمدى 2014 جىلى جاۋلاپ الدى" دەگەن تٷسٸنٸكتەمە قوسىپ قويعان. بٸراق سوعان قاراماستان ۋكراينا سىرتقى ٸستەر مينيسترلٸگٸنٸڭ رەسمي ٶكٸلٸ ولەگ نيكولەنكو BBC-دٸڭ ورىس قىزمەتٸن "رەسەيلٸك ٷگٸت-ناسيحاتتى جارنامالاماۋعا" شاقىردى.
"سەۆاستوپول مەن سيمفەروپول ەشقاشان دا رەسەي قالالارى بولعان ەمەس... حالىقارالىق قۇقىقتىڭ ماڭىزى بار" دەپ جازدى نيكولەنكو 24 قاڭتاردا Twitter-دە.
مەسكەۋ 2014 جىلدىڭ باسىندا قىرىم تٷبەگٸن باسىپ الىپ, بٸرنەشە اپتادان سوڭ ۋكراينانىڭ شىعىسىندا رەسەيشٸل سەپاراتيستەردٸ قولداي باستاعان. قاقتىعىستان كەمٸندە 13 200 ادام قازا بولعان.
قىرىم تاتارلارىنىڭ جەتەكشٸسٸ رەفات شۋباروۆ Facebook جەلٸسٸندە BBC-دىڭ ورىس قىزمەتٸن "سٸزدەر رەسەيگە قىرىمدى باسىپ الۋعا كٶمەكتەسكٸلەرٸڭٸز كەلە مە?" دەپ سۇرادى.
BBC ٶكٸلدەرٸ داۋلى كارتاعا بايلانىستى تٷسٸنٸكتەمە بەرمەدٸ.
23 قاڭتاردا رەسەي قالالارىندا ونداعان مىڭ ادام كٶشەگە شىعىپ, ناۆالنىيدىڭ قامالۋىنا نارازىلىق بٸلدٸرگەن. ناۆالنىي التى كٷن بۇرىن گەرمانييادان مەسكەۋگە ورالعان بەتتە ەۋەجايدا ۇستالىپ, سوت ونى سوت ٶتكەنگە دەيٸن قاماعان. بىلتىر تامىز ايىندا "نوۆيچوك" توبىنا جاتاتىن قاۋٸپتٸ زاتپەن ۋلانعان ناۆالنىي ەسٸن جيماعان كٷيٸ گەرمانيياعا ەمدەۋگە جٸبەرٸلگەن بولاتىن. سول جاقتا ەسٸن جيىپ, بٸرنەشە اي ەمدەلگەن وپپوزيتسييالىق ساياساتكەر سودان بەرٸ العاش رەت ٶز ەلٸنە ورالعاندا ۇستالدى.
