Ulttyq qaýipsizdik komiteti keden beketterindegi ekonomikalyq qylmys transshekaralyq sipatqa ie ekenin jariia etti.
«Qazir syrtqy saýda týraly sóz bolǵanda ekonomikalyq kontrabandamen kúrestiń mańyzy erekshe aitylady. Bul sanatta tirkelgen qylmystardyń statistikasy laýazymdy tulǵalar tarapynan qylmysqa jol berý tendentsiiasy baiqalatynyn kórsetip otyr. Qazaqstannyń Tuńǵysh Prezidenti – Elbasy Nursultan Nazarbaev elimizdegi keden qyzmetin synǵa alǵan edi. Sheteldik sarapshylardyń zertteýi Qytaidan Qazaqstanǵa keletin taýarlardyń jartysy zańsyz kirgiziletinin dáleldei tústi. Sonymen qatar Qazaqstannyń keden statistikasy men tasymaldaýshy eldiń kedendik statistikasynda aiyrmashylyq baiqalady. Jalpy ondai kedendik aiyrmashylyq Qytai men Resei arasyndaǵy saýda-sattyq qarym-qatynasta baiqalmaitynyn atap ótý kerek», - dep habarlaidy UQK -den.
Osy baǵyttaǵy qylmystardyń betin ashý úshin Ulttyq qaýipsizdik komiteti jedel izdestirý sharalaryn júrgizip, qazaq-qytai, qazaq-ózbek shekarasyndaǵy syrtqy ekonomikalyq saýda-sattyqqa qatysýshylardan aqsha kúshtep alynatynyn anyqtaǵan.
«Sonymen qatar QHR-dan Ózbekstanǵa taýardy kedergisiz ótkizý maqsatynda syrtqy ekonomikalyq qatysýshylardan shektesetin memleketterdiń laýazymdy tulǵalarynyń arasynda deldal bolǵan Ózbekstan azamattarynyń bary belgili boldy. Bul jaǵdai osy júieniń transshekaralyq aýqymy baryn aiqyndai túsedi. Osylaisha kedendik, fitosanitarlyq, veterinarlyq, kóliktik baqylaý qyzmetterindegi laýazymdy tulǵalardyń zańsyz áreketteri qujatpen bekitildi. Atap aitqanda Nur joly, Qaljat, Baýyrjan Qonysbaev atyndaǵy keden beketteriniń qyzmetkerleri qysqa ýaqyttyń ishinde 1 mln teńge, 10 myńǵa jýyq dollar, ózge de valiýtadai aqshany alǵan», - delingen komitettiń habarlamasynda
UQK júrgizgen shara barysynda 20 shaqty adam ustalyp, jumys oryndary men turǵylyqty úileri boiynsha tintý jumystary júrgizilgen.
«Tintý barysynda dollar, teńge, rýbl men qyrǵyz somy túrinde aitarlyqtai qomaqty qarajat tárkilengen. Zańsyzdyqtyń jolyn kesý jumystary jalǵasa beredi», - delingen komitettiń habarlamasynda.
