ۇلتتىق قاۋٸپسٸزدٸك كوميتەتٸ كەدەن بەكەتتەرٸندەگٸ ەكونوميكالىق قىلمىس ترانسشەكارالىق سيپاتقا يە ەكەنٸن جارييا ەتتٸ.
«قازٸر سىرتقى ساۋدا تۋرالى سٶز بولعاندا ەكونوميكالىق كونتراباندامەن كٷرەستٸڭ ماڭىزى ەرەكشە ايتىلادى. بۇل ساناتتا تٸركەلگەن قىلمىستاردىڭ ستاتيستيكاسى لاۋازىمدى تۇلعالار تاراپىنان قىلمىسقا جول بەرۋ تەندەنتسيياسى بايقالاتىنىن كٶرسەتٸپ وتىر. قازاقستاننىڭ تۇڭعىش پرەزيدەنتٸ – ەلباسى نۇرسۇلتان نازارباەۆ ەلٸمٸزدەگٸ كەدەن قىزمەتٸن سىنعا العان ەدٸ. شەتەلدٸك ساراپشىلاردىڭ زەرتتەۋٸ قىتايدان قازاقستانعا كەلەتٸن تاۋارلاردىڭ جارتىسى زاڭسىز كٸرگٸزٸلەتٸنٸن دەلەلدەي تٷستٸ. سونىمەن قاتار قازاقستاننىڭ كەدەن ستاتيستيكاسى مەن تاسىمالداۋشى ەلدٸڭ كەدەندٸك ستاتيستيكاسىندا ايىرماشىلىق بايقالادى. جالپى ونداي كەدەندٸك ايىرماشىلىق قىتاي مەن رەسەي اراسىنداعى ساۋدا-ساتتىق قارىم-قاتىناستا بايقالمايتىنىن اتاپ ٶتۋ كەرەك», - دەپ حابارلايدى ۇقك -دەن.
وسى باعىتتاعى قىلمىستاردىڭ بەتٸن اشۋ ٷشٸن ۇلتتىق قاۋٸپسٸزدٸك كوميتەتٸ جەدەل ٸزدەستٸرۋ شارالارىن جٷرگٸزٸپ, قازاق-قىتاي, قازاق-ٶزبەك شەكاراسىنداعى سىرتقى ەكونوميكالىق ساۋدا-ساتتىققا قاتىسۋشىلاردان اقشا كٷشتەپ الىناتىنىن انىقتاعان.
«سونىمەن قاتار قحر-دان ٶزبەكستانعا تاۋاردى كەدەرگٸسٸز ٶتكٸزۋ ماقساتىندا سىرتقى ەكونوميكالىق قاتىسۋشىلاردان شەكتەسەتٸن مەملەكەتتەردٸڭ لاۋازىمدى تۇلعالارىنىڭ اراسىندا دەلدال بولعان ٶزبەكستان ازاماتتارىنىڭ بارى بەلگٸلٸ بولدى. بۇل جاعداي وسى جٷيەنٸڭ ترانسشەكارالىق اۋقىمى بارىن ايقىنداي تٷسەدٸ. وسىلايشا كەدەندٸك, فيتوسانيتارلىق, ۆەتەرينارلىق, كٶلٸكتٸك باقىلاۋ قىزمەتتەرٸندەگٸ لاۋازىمدى تۇلعالاردىڭ زاڭسىز ەرەكەتتەرٸ قۇجاتپەن بەكٸتٸلدٸ. اتاپ ايتقاندا نۇر جولى, قالجات, باۋىرجان قونىسباەۆ اتىنداعى كەدەن بەكەتتەرٸنٸڭ قىزمەتكەرلەرٸ قىسقا ۋاقىتتىڭ ٸشٸندە 1 ملن تەڭگە, 10 مىڭعا جۋىق دوللار, ٶزگە دە ۆاليۋتاداي اقشانى العان», - دەلٸنگەن كوميتەتتٸڭ حابارلاماسىندا
ۇقك جٷرگٸزگەن شارا بارىسىندا 20 شاقتى ادام ۇستالىپ, جۇمىس ورىندارى مەن تۇرعىلىقتى ٷيلەرٸ بويىنشا تٸنتۋ جۇمىستارى جٷرگٸزٸلگەن.
«تٸنتۋ بارىسىندا دوللار, تەڭگە, رۋبل مەن قىرعىز سومى تٷرٸندە ايتارلىقتاي قوماقتى قاراجات تەركٸلەنگەن. زاڭسىزدىقتىڭ جولىن كەسۋ جۇمىستارى جالعاسا بەرەدٸ», - دەلٸنگەن كوميتەتتٸڭ حابارلاماسىندا.
