Kollaj: Azattyq Ruhy
Ulttyq qaýipsizdik komiteti Shekara qyzmetiniń burynǵy basshysy Darhan Dilmanovqa qatysty sot úkimi shyqty.
Almaty garnizonynyń áskeri soty málim etkendei, UQK tóraǵasynyń burynǵy orynbasary - Shekara qyzmetiniń direktory Darhan Dilmanov pen basqa da laýazymdy tulǵalarǵa bilikti asyra paidalandy jáne iri mólsherde para aldy degen aiyp taǵyldy.
«D.E. esimdi azamat D.Dilmanovqa QHR-dan Qazaqstanǵa júkterdi ótkizý pýnkti arqyly aýystyryp tieýdiń ázirlengen qylmystyq shemasyn engizýdi usynǵan. Eger bul sátti júzege assa, ol odan belgili bir tabys alatyny anyqtaldy. Baqylaý pýnkti arqyly taýardy odan shyqpai jáne jalpy kezekti ainalyp ótýdiń zańsyz shemasy engizilýine bailanysty 1750 rettik reis jasaldy, nátijesinde iri shyǵyn keltirildi», - delingen sot habarlamasynda.
Sottalýshylardyń kinási kýágerlermen, áskeri-jarǵylyq zertteýlermen, saraptamalardyń qorytyndylary jáne qujattyq tekserý aktileri arqyly dáleldengen.
Prokýror aiyptalýshylarǵa múlkin tárkilep, 4 jyldan 9 jylǵa deiingi merzimge bas bostandyǵynan aiyrý túrindegi jaza taǵaiyndaýdy surady.
Sottalýshy Q. kinásin moiyndamai, áreketinde qylmys quramynyń bolmaýyna bailanysty aqtaýdy surady.
Darhan Dilmanov jáne basqalar óz kinálaryn tolyq moiyndap, istegen isine ókinip, jazanyń eń jeńil túrin, eń tómengi jaza túrin taǵaiyndaýdy, sondai-aq qosymsha jaza túrlerin qoldanbaýdy surady.
«Sot jasalǵan qylmystyń sipaty men qoǵamdyq qaýiptilik dárejesin eskere otyryp, D.D.-ǵa Qylmystyq kodekstiń 450-baby 2-bóligi boiynsha múlki tárkilenip, 4 jylǵa bas bostandyǵynan aiyrý túrindegi jaza taǵaiyndady.
Qaýly etiledi, Qazaqstan Respýblikasynyń Prezidentine D.D. «general-leitenant» áskeri ataǵynan, II dárejeli «Aibyn»memlekettik nagradasynan jáne «Ulttyq qaýipsizdik komitetiniń ardageri» qurmetti ataǵynan aiyrý týraly usynys engizilsin», - delingen sot úkiminde.
Aiyptalýshy Q. QR QK-niń 28-baby 5-bóligi, 450-baby, 366-baby 3-bóligi, 1, 2, 4-tarmaqtarymen kózdelgen qylmystyq quqyq buzýshylyqtardy jasaǵany úshin kináli dep tanylyp, oǵan 5 jylǵa bas bostandyǵynan aiyrý jazasy taǵaiyndaldy.
E., QR QK-niń 55-babyn paidalana otyryp, QK-niń 366-baby 3-bóliginiń 1, 2, 4-tarmaqshalarynda kózdelgen qylmystyq quqyq buzýshylyqty jasaǵany úshin kináli dep tanylyp, oǵan paranyń 30 eselengen somasy – 1 267 000 teńgege – 38 010 000 teńge aiyppul salyndy.
Qalǵan sottalýshylarǵa múlki tárkilenbesten 3,5 jyldan 5,5 jylǵa deiin bas bostandyǵyn shekteý jazalary taǵaiyndaldy.
Sottalǵandar ómir boiy memlekettik qyzmette qyzmet atqarý quqyǵynan aiyryldy.
Úkim zańdy kúshine engen joq.
