Ulttyq qaýipsizdik komiteti Qazaqstan aýmaǵy arqyly Aýǵanstannan Niderlandyǵa esirtki tasymaldaityn halyqaralyq esirtki sindikatynyń jolyn kesýge baǵyttalǵan arnaiy operatsiia ótkizdi, dep habarlaidy "Ult aqparat" vedomstvonyń baspasóz qyzmetine silteme jasap.
UQK málimetinshe, qylmystyq top Taiaý Shyǵys pen Aziia azamattarynan quralǵan.
"Esirtki kontrabandasy arnasynyń baǵdary Aýǵanstannan bastaý alyp, odan ári Qazaqstan aýmaǵy arqyly júrgen, baratyn jeri Niderland bolǵan. Top áreketiniń aýqymdy geografiiasyn eskere otyryp, UQK Niderland Koroldiginiń quqyq qorǵaý organdarymen ózara is-qimyl uiymdastyrdy.
Operatsiianyń tabysty iske asyrylýyna Ortalyq Aziia óńirlik esirtkige qarsy kúres jónindegi aqparattyq-úilestirý ortalyǵy men Qazaqstan Respýblikasy Bas prokýratýrasynyń qarqyndy túrde járdem kórsetýi yqpal etti", - delingen habarlamada.
Birlesken jedel is-sharalar nátijesinde halyqaralyq esirtki sindikatynyń basty qatysýshylary anyqtalǵan.
"Niderland aýmaǵynda baqylanatyn jetkizý barysynda kýrer ustalyp, odan Aýǵanstanda óndirilgen 30 kilogramm geroin tárkilendi. Budan ári Amsterdam qalasy quqyq qorǵaý organdary tintý barysynda iri esirtki plantatsiiasyn anyqtady" - delingen UQK málimetinde.
Sarapshylardyń derekteri boiynsha, jetkiziletin elde alynǵan esirtki quraldarynyń quny 2 mln. AQSh dollaryn quraidy.
Anyqtalǵan faktiler boiynsha Niderland quqyq qorǵaý organdary sotqa deiingi tergeý júrgizýde.
