Ulttyq qaýipsizdik komitetiniń burynǵy tóraǵasy Nartai Dútbaev KTK telearnasy daiyndaǵan "Zvali ego Mýrka" filminiń úshinshi bóliminde Muhtar Ábliazovqa qalai kómekteskenin aityp berdi.
"Abliazov Muhtar Qabylulymen Qazaqstan Respýblikasynyń Ulttyq qaýipsizdik komitetiniń tóraǵasy bolyp turǵanymda tanystym. Sol kezde Rahat Álievpen jaǵymsyz qarym-qatynasym boldy, al Ábliazov Qazaqstannyń Demokratiialyq tańdaýy lideri boldy. Sol kezeńde osyndai qozǵalys bolǵan. Álievpen jaǵymsyz qarym-qatynasymdy eskere otyryp, Ábliazovti Rahatpen teketiresimde paidalanýdy uiǵardym", - dep áńgimeledi Dútbaev.
Sonymen qatar, ol Muhtar Jákishevpen ne jaily sóileskenin aitty.
"2003 jyly Jákishev Muhtar Erkinuly (qazaqstandyq biznesmen ári Qazatomónerkásip eks-basshysy - Avt.) habarlasty. Jákishevpen dostyq qarym-qatynasta edik. Ol Ábliazovti bosatyp jiberýdi durys dep esepteitinin aitty. (...) Ortaq kúsh jumyldyra otyryp, Ábliazovti bosattyq", - dedi Nartai Dútbaev.
Telearna málimetinshe, Ábliazov sol kezde Prezidentten keshirim suraǵan.
UQK eks-basshysy Erjan Tátishevtiń uialy telefondaryna baqylaý júrgizýdi tapsyrǵanyn moiyndap otyr.
"Olardyń arasynda (Ábliazov pen Tátishevti aitady - Avt.) janjal shyǵyp, dushpanǵa ainaldy. Sonda Ábliazov Tátishevke qatysty bank aktivterin qaitarýǵa kómektesetin málimet jinaýdy ótindi. Men kelistim, sóittim de QR UQK AAQ qyzmetkeri Repnikovty shaqyrtyp, oǵan Tátishevtiń uialy bailanystaryna baqylaý qoiýdy tapsyrdym", - dedi Dútbaev.
UQK burynǵy qyzmetkeri Oleg Repnikov qol jetkizilgen aqparatty Almatydaǵy tóraǵaǵa "jeke" degen jeleýmen jóneltip otyrǵanyn aitty. Taǵy bir UQK eks-qyzmetkeri Bekbolat Qanǵojinniń aitýynsha, Tátishev "bankir" degen laqapatpen baqylaýda bolǵan jáne ol jaily málimet komitet tóraǵasy Dútbaevqa baiandalyp otyrǵan.
"Bul málimettiń ishinde sipattaityn málimetter, qozǵalý ádisteri, baǵyttary, bailanystary, aralasatyn ortasy, ádetteri bolatyn. Osyndai málimet túsip otyratyn, osyny Ábliazovke telefon arqyly baiandaitynmyn. Sol kezde Tátishevtiń Toqmádi degen bireýmen jaqyn aralasatyny jaily málimet boldy. Ol qylmys áleminiń serkesi bolǵan. Olardyń birge ańǵa shyǵatyny jaily anyqtaldy", - dep atap ótti Dútbaev.
Onyń aitýynsha, Tátishevtiń qazasynan keiin "Bank Turan Álem" (qazirgi BTA Bank) bankin basqarýǵa jáne ielik etýge talas bastalǵan.
"Tátishevtiń áieli Aitjanova kúieýiniń banktegi úlesin aldy jáne ózi bankti basqarǵysy keldi. Bankte qaqtyǵystar bastalyp, sonda Ábliazov bankti basqarýda qoldaý kórsetýimdi ótindi. Bul isti 4-departamenttiń sol kezdegi basshysy Bilisbekov Nurǵali Dáýletbekulyna tapsyrdym", - dep ashyǵyn aitty burynǵy tóraǵa.
Dútbaev Ábliazovpen kóbinde telefon arqyly sóileskenin jáne keide Skype-ty qoldanǵanyn aitty.
