15 mamyrda Almaty Qylmystyq ister boiynsha mamandandyrylǵan aýdanaralyq soty «Aliev» UQT jetekshisi Qadyr Alievke jáne qylmystyq topqa qatysýshylar Ańsar Dartaevqa, Dmitrii Tereshin men Ersen Jumabaevqa úkim shyǵardy, dep habarlaidy «Ult aqparat» QR UQK Baspasóz qyzmetine silteme jasap.
Ulttyq qaýipsizdik komitetiniń habarlaýynsha, sottalǵandardyń tórteýi de QR QK 125-babynyń 2-b. 1), 8) tarmaqtarymen, 191-babynyń 4-b. 2) tarmaǵymen, 287-babynyń 3-b. jáne 390-babynyń 2-b. (adam urlaý, tonaý, qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý, bilik ókiliniń nemese jaýapty memlekettik laýazym atqaratyn laýazymdy adamnyń ataǵyn ózdiginen iemdený) kózdelgen qylmystardy jasaǵany úshin kináli dep tanylǵan.
UQT jetekshisi men oǵan qatysýshylar K. Aliev, A. Dartaev, D. Tereshin men E. Jumabaev 7 jyl jáne 1 aiǵa bas bostandyǵynan aiyrýmen qaýipsizdigi ortasha túzeý mekemesinde jazasyn óteýge sottaldy.
Buryn habarlanǵandai, 2018 jylǵy 10 qazanda Almatyda QR Ulttyq qaýipsizdik komiteti Ishki ister ministrligimen birlesip, Almaty oblysynyń turǵyny K. Alievtiń jetekshiligindegi asa qaýipti qarýly uiymdasqan qylmystyq top áreketin anyqtap, jolyn kesti.
«Qylmystyq toptyń negizin burynǵy quqyq qorǵaý organdarynyń qyzmetkerleri quraǵan, olar 2018 jylǵy 13 qyrkúiekte Jambyl oblysynda Otar stantsiiasynda kásipker R. Agaliýllinge qarýly shabýyl jasap, 107 myń dollar, 4 million rýbl jáne 23 myń evro iemdengen. Tintý is-sharalary barysynda ustalǵandardan 8 pistolet pen qarý, 140 birlik oq-dári, radiostantsiialar, avtomobilderdiń jalǵan nomerlik tirkeý belgileri, matadan jasalǵan betperdeler, kisender men basqa da qaraqshylyq shabýyl jasaýǵa arnalǵan quraldar tabylyp, alyndy» delingen habarlamada.
Júrgizilgen jedel-tergeý is-sharalarymen urlanǵan aqshalai qarajat jábirlenýshige qaitarylǵan.
