QR Premer-Ministri Álihan Smaiylov biylǵy sý tasqyny kezeńiniń máseleleri jóninde keńes ótkizdi, dep habarlaidy QazAqparat tilshisi Úkimettiń resmi saityna silteme jasap.
Tótenshe jaǵdailar ministri Iýrii Ilinniń aitýynsha, búgingi tańda Aqtóbe jáne Batys Qazaqstan oblystarynda kúrdeli jaǵdai qalyptasyp otyr.
Sý tasqyny kezeńi bastalǵannan beri Aqtóbe, Batys Qazaqstan, Pavlodar, Qaraǵandy oblystarynyń 8 eldi mekeninde 184 turǵyn úi jáne 72 saiajai úileri, 2 áleýmettik nysan erigen qar sýynyń astynda qalǵan.
«TJM men jergilikti atqarýshy organdardyń kúshimen Batys Qazaqstan, Pavlodar, Aqtóbe jáne Qaraǵandy oblystaryndaǵy 184 úiden, Aqtóbe qalasyndaǵy 17 saiajai úiinen, sondai-aq 2 áleýmettik nysannan sý shyǵaryldy. Sý basqan 57 saiajai úii baqylaýda tur. Búginde Qazaqstan óńirlerinde 969 adam evakýatsiialandy, olardyń 493-i ýaqytsha panalaý pýnktterinde, 476-sy týystarynyń úilerine ornalastyryldy», - dep habarlady Ilin.
TJM basshysynyń málimetine qaraǵanda, Aqtóbe oblysyndaǵy respýblikalyq mańyzy bar joldyń bir ýchaskesin, oblystyq jáne jergilikti mańyzy bar 12 ýchaskeni sý basqan jáne jergilikti mańyzy bar avtojoldardyń 15 ýchaskesin sý shaiyp, Aqtóbe oblysyndaǵy bir kópir qiraǵan.
"Apattyq-qutqarý jumystaryna 2 myńnan astam adam, 500 tehnika, sý sorǵysh quraldar men júzý quraldary jumyldyryldy.
Sý tasqyny jaǵdaiynyń kúrdelenýine bailanysty Batys Qazaqstan oblysyna Mańǵystaý jáne Atyraý oblystarynan TJM qosymsha qutqarý bólimsheleri, jeke quramnan 92 adam, 13 birlik tehnika, júzý quraldary men motopompalar jiberildi" - delingen habarlamada.
Iu. Ilinniń aitýynsha, oryn alǵan jaǵdaiǵa aýa-raiynyń kúrt jylynýy yqpal etti, bul qardyń tez erýine jáne egistikterden erigen qar sýlarynyń kelýine sebep boldy. Tek sońǵy aptada eldegi qar jamylǵysy 60-tan 40%-ǵa deiin tómendedi. Sońǵy jyldary klimattyń ózgerýine bailanysty elimizde bolyp jatqan protsester sý tasqyny jaǵdaiyna túbegeili áser etedi, óitkeni sońǵy 50 jyl jáne odan da kóp ýaqyt boiy sý basý máselesi bolmaǵan eldi mekenderde sý basý jaǵdailary tirkelip jatyr.
Oryn alǵan jaǵdaidyń negizgi sebepteri — qardyń ýaqytyly shyǵarylmaýy, sý ótkizý qurylystarynyń, drenajdyq nemese aryq júieleriniń jetkiliksiz tazalanýy, inertti materialdar qorynyń daiyn bolmaýy.
Keńes qorytyndysy boiynsha, QR Premer-Ministri óńirlerde qalyptasqan sý tasqyny jaǵdaiy ákimdikterdiń qardy ýaqytyly shyǵarmaýyna, kanaldar men aryqtardyń jetkiliksiz tazartylýyna, sý tasqynynyń aldyn alý sharalaryn qarjylandyrýdyń jetkiliksiz bolǵanyna bailanysty dedi.
Osy oraida Batys Qazaqstan, Aqtóbe, Pavlodar jáne Qaraǵandy oblystarynyń ákimderi qaýipsiz jerge kóshirilgen azamattarǵa tiisti jaǵdai jasap, erigen qar sýyn shyǵarý, sý astynda qalǵan úiler men infraqurylymdy qalpyna keltirý boiynsha jumystar júrgizýi kerek.
Taiaý kúnderi aýa temperatýrasynyń kóterilip, birqatar óńirde ahýal odan saiyn aýyrlai túsýi múmkin. Osyǵan bailanysty Álihan Smaiylov sý tasqynyna turaqty monitoring pen baqylaý jasap, qalyptasqan jaǵdaiǵa jedel jaýap berip otyrýdy tapsyrdy.
«Sý tasqyny qaýpi bar ýchaskelerge jaqyn mańǵa arnaiy jáne injenerlik tehnikany, qum salynǵan qaptardy jetkizý qajet. Sondai-aq sý tasqyny kezinde kólik qatynasy shektelýi múmkin eldi mekenderdi anyqtap, ol jerlerde azyq-túlik ónimderi men aýyz sý qoryn daiyndaǵan jón», — dedi Premer-Ministr.
Ekologiia ministrligi óńirlerdiń ákimdikterimen birlesip, sý qoimalarynyń jai-kúiine, sondai-aq sý tasqyny qaýpi bar ózenderdegi jaǵdaiǵa turaqty baqylaý ornatýy qajet. Qajet bolǵan jaǵdaida sý qoimalaryn aldyn ala jáne qaýipsiz bosatý boiynsha sharalar qabyldaý kerek.
TJM Aqparat ministrligimen birlese otyryp, eldi mekenderdi sý basý jáne qaýipti aimaqtardan evakýatsiialaý kezinde turǵyndardyń tiisti qaýipsizdik erejelerin saqtaý týraly aqparattandyrý jumystaryn jandandyrýy tiis.
Álihan Smaiylov sondai-aq óńirlerdiń ákimderine sý tasqyny barysyn qatań baqylaýǵa alýdy, kelesi jyly sý basý qaýpin edáýir tómendetý úshin 2021-2023 jyldarǵa arnalǵan Sý tasqynyna qarsy is-sharalardyń jol kartasyn iske asyrý boiynsha sharalar qabyldaýdy tapsyrdy.
