QR Úkimetiniń búgingi otyrysynda Túrkistan qalasynyń bas jospary jobasy qaraldy jáne maquldandy, dep habarlaidy "Ult aqparat".
«Elbasy Nursultan Ábishuly Nazarbaevtyń tarihi sheshiminiń arqasynda qasietti Túrkistan qalasy - búkil túrki áleminiń mádeni-rýhani astanasy retinde órkendeýine úlken serpin berildi. Qazirgi tańda Túrkistan – elimizdiń rýhani jańǵyrýynyń simvolyna ainalýda. Memleket basshysy Qasym-Jomart Toqaev Túrkistan qalasynyń damýyna úlken nazar aýdarady», - dep atap ótti QR Premer-Ministri Asqar Mamin.
Úkimet basshysy Túrkistannyń jańadan damýyn, tarihi qundylyqtardy saqtai otyryp, odan ári kórkeiýin qamtamasyz etý maqsatynda 2018 jylǵy qyrkúiekte Túrkistan qalasyn damytýdyń bas josparynyń tujyrymdamasy maquldanǵanyn eske saldy.
«Qysqa merzimde naqty jumys atqaryldy. Túrkistan qalasynyń mádeni-rýhani jáne ákimshilik-iskerlik ortalyqtarynyń, kólik jáne injenerlik infraqurylymy, turǵyn úiler aimaǵynyń qurylysy qarqyndy júrgizildi. Jalpy, oblys ortalyǵy Túrkistan qalasyna kóshirilgennen beri qalanyń negizgi kapitalǵa investitsiialar kólemi - 400 mlrd teńgeni qurady. Jańa bas josparǵa sáikes qala aýmaǵy birshama ulǵaidy – 3 myń gektarǵa jýyq. Sonymen qatar, qala turǵyndarynyń sany 176 myńǵa deiin ósti, 2025 jylǵa qarai qala halqynyń sany 250 myńǵa deiin, al 2035 jylǵa qarai 350 myńǵa deiin jetetin bolady», - deidi Asqar Mamin.
Onyń aitýynsha, tez ósip kele jatqan qalanyń barlyq muqtajdyǵy Túrkistan qalasyn damytý boiynsha usynylyp otyrǵan josparda eskerilgen. Ol qala turǵyndary men onyń qonaqtary úshin tolyqqandy jaily orta qurýǵa múmkindik beredi.
«Usynylǵan jospar qalanyń jáne Túrkistan oblysynyń atqarýshy organdarymen jáne de ortalyq memlekettik organdarmen kelisilgen. Qala infraqurylymyn damytýdyń tiisti shemalary ázirlengen. Jospardy qabyldaý – Túrkistan qalasynyń aldaǵy ýaqytta damýynyń naqty baǵytyn belgileidi. Sondyqtan usynylyp otyrǵan jospar jobasyn qoldaýdy jáne Úkimettiń tiisti qaýlysyna daýys berýdi usynamyn», - dedi Asqar Mamin.
