© Sputnik / Vladislav Vodnev
Premer-ministrdiń orynbasary - Saýda jáne integratsiia ministri Serik Jumanǵarin sailaýdan keiingi infliatsiia týraly aitty, dep habarlaidy Sputnik Qazaqstan.
Búgin vitse-premer №393 sailaý ýchaskesinde daýys berdi. Odan keiin jýrnalisterdiń birneshe suraǵyna jaýap berdi. Sonyń biri - infliatsiia máselesi.
Jyldyń sońynda qymbatshylyq sharyqtaý shegine jetedi degen boljam bar.
"Qazir infliatsiianyń deńgeii 18,8 protsent bolyp tur. Ózderińiz bilesiz, Úkimet keshendi jospardy bekitti. Onda tórt jylda atqarylatyn 67 is-shara bar. Sony oryndasaq, taýyq eti, alma, balyq, irimshik, súzbeden importtyq táýeldilikten tolyǵymen ketemiz", - dedi Jumanǵarin.
Tilshiler infliatsiianyń sharyqtaý sheginde qymbatshylyq qansha protsent bolatynyn surady. Vitse-premerdiń aitýynsha, Úkimet qazirgi deńgeiden asyrmaýǵa tyrysady.
"Qazirgi maqsat - jyldyń aiaǵyna deiin osy infliatsiia deńgeiinen aspaý. Sol deńgeide qaldyrýǵa tyrysamyz. Kelesi jylda qolǵa alyp jatqan reformalar áser etedi dep oilaimyz. Qazir árbir jýrnalistiń, árbir adamnyń suraityn mańyzy máselesi, ol - baǵa qashan turaqtalady? Árine, ol ózimizdiń aýyl sharýashylyǵyna bailanysty, sebebi qazirgi kezde biz importqa táýeldimiz. Sol táýeldilikten ketýimiz kerek. Biz qazir biraz reformalardy bastadyq. Bir-eki jyldyń ishinde ózgeristerdi kóremiz dep esepteimiz", - dep atap kórsetti Jumanǵarin.
