Foto: ShQO ákimdigi
Úkimet Shyǵys Qazaqstan oblysy Ridder qalasyndaǵy jylý jelileri men JEO jabdyqtaryn jóndeýge rezervten shamamen 1,8 mlrd teńge bóldi. Tiisti qaýlyǵa Premer-ministr Oljas Bektenov qol qoidy, dep habarlaidy Ult.kz.
Qarajat qalany jylýmen qamtý senimdiligin arttyrýǵa jáne infraqurylymdy 2026-2027 jyldardaǵy jylytý maýsymyna daiyndaýǵa jumsalady. Bólingen qarjy jylý jelisiniń tozyǵy jetken 12 ýchaskesine, sondai-aq Ridder JEO-daǵy №5 jáne №6 qazandyq agregattarynda kúrdeli jóndeý jobalaryn aiaqtaýǵa baǵyttalady.
Jumystardy júrgizý qajettiligi tehnikalyq tekserý nátijelerimen rastaldy. Mamandar jylý júiesiniń turaqty jumysyn qamtamasyz etý úshin birinshi kezekte jóndeýdi qajet etetin ýchaskeler men jabdyqtardy anyqtady. Ótken jylytý maýsymy barysynda jekelegen ýchaskelerde zaqymdanýlar men tozý belgileri anyqtalyp, olardy josparly túrde jańartý qajettiligi dáleldendi.
Qazandyq agregattary men jylý jelilerin jóndeý jylý júiesiniń turaqty jumysyn arttyryp, qala turǵyndaryn jylýmen qamtýdyń senimdiligin jaqsartýǵa múmkindik beredi.
