Úkimet rezervinen koronavirýspen kúreske 66 mlrd teńge bólingen. Bul týraly QR Qarjy ministriniń birinshi orynbasary Berik Sholpanqulov aitty, dep habarlaidy QazAqparat.
«Epidemiiaǵa qarsy is-sharalardy júrgizýge 125 mlrd teńge kózdelgen. Bul qarajat meditsina jáne basqa qyzmetkerlerge qosymsha aqy tóleýge, 3 infektsiialyq aýrýhana qurylysyna jáne basqa sharalarǵa jumsaldy», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, 575 mlrd teńge qosymsha shyǵystar azamattar men ekonomikany qoldaýǵa jáne Memleket basshysynyń tapsyrmalaryn iske asyrýǵa, Nur-Sultan qalasyndaǵy úlestik qurylystyń problemalyq nysandaryn aiaqtaýǵa jáne basqa da basym mindetterge baǵyttalǵan.
«Sondai-aq, koronavirýs indetimen kúreske Úkimet rezervinen 66 mlrd 957 mln teńge, onyń ishinde Densaýlyq saqtaý ministrligine 46 mlrd 587 mln teńge bólindi», - dedi Berik Sholpanqulov.
