QR Premer-Ministriniń birinshi orynbasary Roman Skliar Jekelegen óńirlerdegi tártipsizdikter nátijesinde keltirilgen zalaldardy joiý máseleleri jónindegi Úkimettik komissiianyń kezekti otyrysyn ótkizdi. Bul týraly primeminister.kz saity habarlaidy.
Óńirlerdiń ákimdikterimen jáne múddeli memlekettik organdarmen oryn alǵan tártipsizdikter nátijesinde keltirilgen zalaldy óteý jáne qalpyna keltirý jumystaryn uiymdastyrý máseleleri qaraldy.
Júrgizilip jatqan jumystar týraly indýstriia jáne infraqurylymdyq damý ministri Q. Óskenbaev jáne Almaty, Shymkent qalalary, Almaty, Jambyl, Shyǵys Qazaqstan, Qyzylorda oblystary ákimderiniń orynbasarlary egjei-tegjeili baiandama jasady.
8 óńirde 270 nysan, onyń ishinde 45 ákimshilik jáne 225 kommertsiialyq ǵimarat zardap shekti. 44 ákimshilik nysandy qalpyna keltirý boiynsha jumystar bastaldy, al Shymkent jáne Almaty qalalarynda 12 kommertsiialyq nysan boiynsha jumystar aiaqtaldy.
Budan basqa, komissiia otyrysynda Úkimet rezervi qarajaty esebinen shaǵyn jáne orta biznes ókilderine keltirilgen zalaldy óteý mehanizmi bekitildi.
Bekitilgen mehanizmge sáikes kásipkerlerdiń jyljymaityn múlik obektileri boiynsha zalal rastalǵan smetalyq qujattama negizinde óteletin bolady.
Bul rette joǵalǵan taýarlyq-materialdyq qundylyqtar boiynsha óteý kólemin óńirlik komissiialar «Atameken» ulttyq kásipkerler palatasymen birlesip, rastaityn fiskaldyq qujattardy negizge ala otyryp aiqyndaityn bolady.
R. Skliar zardap shekken nysandardy qalpyna keltirý jáne tekserýdi aiaqtaý boiynsha jumystardy jedeldetý, sondai-aq qabyldanyp jatqan sharalar týraly halyqty habardar etý týraly tapsyrma berdi.
