QR Premer-Ministriniń birinshi orynbasary Álihan Smaiylovtyń tóraǵalyǵymen «Atameken» UKP jáne memlekettik organ ókilderiniń qatysýymen kezdesýler legi jalǵasyp jatyr. Onda biznestiń júieli máseleleri jáne olardy sheshý joldary qarastyrylýda, dep habarlaidy "Ult aqparat" primeminister.kz resýrsyna silteme jasap.
Atap aitqanda, Ózbekstannan Qazaqstanǵa jeńil ónerkásip ónimderin jáne basqa da tutyný taýarlaryn zańsyz tasymaldaý otandyq ónimniń satylýy men óndirisiniń tómendeýine, jumys oryndarynyń qysqarýyna, biýdjetke salyq túsimderiniń azaiýyna alyp keldi.
Osy jaǵdaidy sheshý úshin Á. Smaiylov tiisti memlekettik organdarǵa zańsyz importqa qarsy Jol kartasyn ázirleýdi tapsyrdy.
Koronavirýs pandemiiasy aviatsiia salasynyń biznes-protsesterine de aitarlyqtai áser etti.
Qazaqstandyq áýe kompaniialary úshin EAEO elderiniń aýmaǵynda aviatsiialyq qozǵaltqyshtardy, otandyq áýe kemelerine arnalǵan qosalqy bólshekter men jabdyqtardy jetkizý merzimderiniń saqtalmaýy, sondai-aq olardy jóndeýge jáne tehnikalyq qyzmet kórsetýge qatysty tárizdi problemalar týyndady, sonyń saldarynan atalǵan saladaǵy modernizatsiia álsiredi.
Otyrysta jer zańnamasyn buzǵany úshin ákimshilik jaýapkershiliktiń tiimdi sharalaryn qabyldaý máselesi de talqylandy.
Árbir talqylanǵan másele boiynsha sheshim qabyldanyp, nusqaýlar berildi, birqatar máseleler ýákiletti organdar tarapynan jan-jaqty talqylanýy úshin vedomstvoaralyq komissiianyń qaraýyna jiberiledi.
Buǵan deiin agrarlyq sektordy qoldaý, jeńildetilgen jáne lizingtik nesieleý baǵdarlamasyn iske asyrý, sý únemdeitin tehnologiialardy ázirleý, shetelden satyp alynǵan baǵdarlamalyq jasaqtamany otandyq baǵdarlamalarǵa almastyrý múmkindigi, qurylysta eýrokodtardy paidalaný, memlekettik satyp alý portalynda otandyq óndirýshilerdiń tizimin jańartý jáne otandyq biznesti damytý men qoldaýdyń basqa da máseleleri qaralǵan edi.
