Qazaqstan Prezidenti Qasym-Jomart Toqaev Úkimetke jaiylymdyq jerler tapshylyǵyn sheshýdi tapsyrdy, dep habarlaidy Sputnik Qazaqstan.
Buǵan deiin Prezident bos jatqan jaiylymdyq jerlerdi tezirek qaitaryp, aýyl turǵyndaryna berýdi tapsyrǵan edi.
Aitýynsha, jumys júrgizilip jatyr. Biraq bul jerde de Aýyl sharýashylyǵy ministrligi men ákimdikter kózboiaýshylyqqa jol bergen.
"Ministrlik jaiylymdyq jerdiń tapshylyǵy 6,8 million gektarǵa nemese 32 paiyzǵa azaidy dep málimet berip otyr. Bul sharýa qojalyqtarymen memorandýmǵa qol qoiýdyń jáne eldi mekender aýmaǵyn keńeitýdiń arqasynda múmkin boldy. Alaida Bas prokýratýranyń tekserisi kórsetkendei, birqatar óńirde jaiylymdyq jerdiń tapshylyǵy áli de azaimaǵan", - dedi Toqaev Úkimettiń keńeitilgen otyrysynda.
Aqmola, Atyraý jáne Qostanai oblystarynda aýyl turǵyndaryna maldy fermerlerdiń jerine jaiýǵa ruqsat beriledi degen jalǵan memorandým jasalǵan.
Shyn máninde, jaiylymdyq jerdiń tapshylyǵy qaǵaz júzinde ǵana azaiǵan. Budan bólek óńirde halyqtyń jaiylymǵa degen suranysyn tómendetip kórsete bastaǵan.
"Úkimet nege buǵan kóz juma qarap otyr? Mundai áreketter aýyl halqynyń narazylyǵyn órshitpese, kemitpeidi. Úkimetke jergilikti atqarýshy organdarmen birlesip, osy máseleni túbegeili sheshýdi tapsyramyn", - dedi Memleket basshysy.
