- Parlament Májilisiniń depýtaty Irina Smirnova bilim berý salasyna bólinetin qarjyny kóbeitip, muǵalimderdiń jalaqysyn kóterý boiynsha Úkimetke joldaǵan depýtattyq saýalyna jaýap aldy. Onyń aitýynsha, jaýap xatty daiyndaǵandar ony durys túsinbedi, dep xabarlaidy QazAqparat tilshisi.
"Iá, Úkimetten jaýap keldi. Árine, ondai aqshanyń bilim berý salasyna bólingeni jaqsy bolar edi deidi. Biraq, ázirshe biz ekonomikalyq kúsh-qýatymyz jaǵynan Ekonomikalyq yntymaqtastyq jáne damý uiymyna kiretin eldermen teńese almaidy ekenbiz. Sol sebepti dál qazir bilim berý salasyna qyrýar qarjyny bólgen jaǵdaida birden oń nátijege jetý qiyn deidi. Alaida men óz depýtattyq saýalymdy joldaǵanda jai qyrýar aqshany bere salyńdar dep aitqan joqpyn. Ol aqsha jetispei jatyr degenmin. Sondyqtan aqsha jetpei tursa, ony ashyq aitý kerek. Mektepterdi qarjylandyrý kólemi aitarlyqtai dárejede emes, muǵalimder laiyqty jalaqysyn almai otyr. Osyny ashyq aitý qajet. Sosyn aldaǵy ýaqytta bilim berý salasyndaǵy jaǵdai qalai ózgeredi? Onyń bolashaǵyna bir kóz tastap, nendei oń ózgerister bolady? Bir úmit otyn jaǵyp qoisa da bolady ǵoi. Al maǵan joldaǵan xatta qur ondai aqshany bóle almaimyz dep jazǵan. Negizi, ondai aqshany tabýǵa bolady. Izdese, tabylady", - dedi I.Smirnova QazAqparat tilshisine bergen suxbatynda.
Depýtattyń oiynsha, muǵalimderdiń jalaqysy bir stavka úshin, kem degende, 150 000 teńge bolýy qajet. Al klass jetekshiligi men san alýan ádistemelik jumystardy qosqanda 200 000 teńge tólense, qazaqstandyq muǵalimderdiń qatary siremei, kerisinshe, kásibi mamandarmen tolyǵatyn edi. "Muǵalimderdiń eńbegin laiyqty baǵalaý máselesin qaperden eshqashan shyǵarmaý qajet. Eger biz olardyń jalaqysyn ósirmesek, bilim berý salasyna aqshany kóptep bólmesek, onda ol aqshany basqa salalarǵa bólýdiń eshbir qajeti joq", - dep atap kórsetti I.Smirnova.
Aita keteiik, qyrkúiek aiynda ótken QR Parlament Májilisiniń otyrysynda depýtat Irina Smirnova bilim berý salasyn qarjylandyrý máselesin kóterip, qazaqstandyq muǵalimderdiń jalaqysy tym az ekenin jetkizdi. Halyq qalaýlysy sonyń bárin depýtattyq saýalda kórsetip, ony Úkimet basshysynyń atyna joldady. Depýtattyń aitýynsha, búginde Daniia, Islandiia jáne taǵy basqa Eýropa memleketterinde bilim berý salasyn qarjylandyrý kólemi ishki jalpy ónimge shaqqanda 6-9 paiyzdy qurap otyr. Sonyń nátijesinde Germaniia siiaqty elde muǵalimderdiń jalaqysy 4 myń eýroǵa deiin jetedi. Kórshi Qytaida mektep muǵalimderi, kem degende, 1 myń AQSh dollaryn alady. "Bizde bolsa, muǵalimderdiń eńbekaqysy 40-50 myń teńgeni quraidy. Synyp jetekshiligi úshin 5-aq myń qosady. Ondai júiemen bilim berý salasyn damytý qiyn. Qazaqstan da bilim berý salasyn qarjylandyrý kólemin ishki jalpy ónimge shaqqanda 6-9 paiyzǵa deiin jetkizýi tiis", - deidi depýtat Smirnova.
.jpeg)