Foto: Baq.kz
Búgin ótken Úkimet otyrysynda Premer-ministr Oljas Bektenov Mindetti áleýmettik meditsinalyq saqtandyrý (MÁMS) qorynyń biznes-protsesterin transformatsiialaý barysyna nazar aýdaryp, jumysty jedeldetýdi tapsyrdy, dep habarlaidy Ult.kz.
Onyń aitýynsha, MÁMS qory qazirgi tańda densaýlyq saqtaý júiesiniń negizgi tetigi bolyp sanalady. Alaida qordyń biznes-protsesterin jańǵyrtý men tsifrlandyrý jumystary baiaý júrgizilip jatyr.
«Ásirese josparlaý, tólem júrgizý jáne satyp alý baǵyttarynda keshigýler baiqalady. Sondyqtan Qor jumysty barynsha jandandyrýy qajet. Meditsinalyq kómekti qoljetimdi, sapaly ári azamattardyń suranysyna sai etý úshin júiede úilesimdi jáne jedel sharalar qabyldanýy tiis», — dedi Úkimet basshysy.
Premer-ministr kelesi jyldan bastap turmysy tómen azamattar MÁMS boiynsha meditsinalyq kómek alatynyn basa aitty.
«2026 jyldan bastap turmysy tómen azamattar jergilikti biýdjetter esebinen meditsinalyq saqtandyrý júiesimen qosymsha qamtylady. Osyndai aýqymdy ózgeristerdi birlesip júzege asyrýǵa kúsh jumyldyrý kerek», — dep atap ótti Oljas Bektenov.
Premer-ministr tapsyrmalary:
Densaýlyq saqtaý ministrligi men Eńbek ministrligine jáne óńir ákimdikterge:
- - meditsinalyq saqtandyrýdyń jańa tetigin engizý boiynsha úilesimdi jumysty júrgizý;
- - óńir ákimdikteri men Densaýlyq saqtaý ministrligi meditsinalyq kómek sapasyn arttyrý boiynsha pármendi sharalar qabyldaý;
- - saqtandyrý júiesine jarna tóleýge qatysty mindettemelerdiń oryndalýyn qamtamasyz etý;
- - jergilikti deńgeide engizilip jatqan ózgeristerdi iske asyrýǵa ákimdikterdi barynsha jumyldyrý.
Áleýmettik meditsinalyq saqtandyrý qoryna:
- - osy jyldyń sońyna deiin qordyń biznes-protsesterin avtomattandyrý jáne ońtailandyrýdy aiaqtaý;
- - azamattar men meditsinalyq uiymdar úshin yńǵaily servisterdi qamtityn tsifrlyq platformany tolyq qaita qaraýdy tapsyrdy.
Densaýlyq saqtaý ministrligi men Mádeniet jáne aqparat ministrligine:
- - biylǵy 1 jeltoqsanǵa deiin meditsinalyq saqtandyrýdyń jańa normalaryn aqparattyq-túsindirý boiynsha jumys josparyn ázirlep, iske asyrý;
- - buqaralyq aqparat quraldaryn, tsifrlyq alańdardy, áleýmettik jelilerdi, óńirlik is-sharalardy barynsha paidalaný.
Sondai-aq Oljas Bektenov JI elementterin engizý arqyly qarjynyń tiimdi jumsalýyn jáne meditsinalyq qyzmetter sapasyn qatań baqylaýǵa alýdy tapsyrdy.
Premer-ministr Oljas Bektenov Úkimet otyrysynda meditsinalyq kómek kórsetýge 2025 jyly memlekettik biýdjetten 3 trln teńge bólingenin atap ótti.
«Bul – qomaqty qarajat. Sondyqtan Densaýlyq saqtaý ministrligi qarjynyń tiimdi jumsalýyn jáne meditsinalyq qyzmetterdiń sapasyn, onyń ishinde tsifrlyq quraldar men jasandy intellekt elementterin engizý arqyly qatań baqylaýǵa alsyn.
Sonymen qatar ministrlik meditsinalyq kómek kórsetý standarttary men erejelerin qaita qaraýy kerek. Emdelýshiler úshin bárin ońtailandyryp, barynsha jeńildetý kerek», — dep tapsyrdy Oljas Bektenov.
