QR Prezidentiniń tapsyrmasy boiynsha QR Premer-Ministriniń orynbasary Berdibek Saparbaev bastaǵan Qordai aýdanyndaǵy oqiǵa saldaryn joiý jónindegi Úkimet komissiiasy Jambyl oblysyna bardy, dep habarlaidy "Ult aqparat".
Qordai aýylynda vitse-premer arýhanaǵa bardy, toptasqan tóbeles kezinde zardap shekken turǵyndarmen sóilesti. Meditsinalyq mekemelerge 12 adam jatqyzyldy, 20 adam baqylaýda jáne emhanadan shyǵarýǵa ázirlenýde. 5 patsient sanitariialyq aviatsiia jelisi boiynsha Almaty qalasyna, 1 patsient Taraz qalasyna aýystyryldy. Barlyǵyna qajetti meditsinalyq kómek tolyq kólemde kórsetilip jatyr. Meditsinalyq kómekke barlyǵy 127 adam júgindi, onyń ishinde 84 adam tekserýden soń úilerine jiberildi.
«Sebebi - turmystyq kikiljiń. Qazir jaǵdai turaqtaldy. Barlyǵy zań boiynsha, quqyqtyq sala aiasynda bolýyn suraimyz», - dedi Sortóbe aýylynyń turǵyny Arli Mýsarov.
«Biz sizderden, qoǵamda bedeli bar aqsaqaldardan turǵyndarǵa bizdiń jaǵdaidy obektivti turǵyda anyqtaý úshin kelgenimizdi túsindirýlerińizdi ótinemiz. Kináliler jazasyn tartady. Barlyq zardap shekkenderge qajetti meditsinalyq jáne basqa da kómek kórsetilip jatyr. Qazir basty másele - óńirdegi turaqtylyqty, quqyqtyq tártip pen qaýipsizdikti qamtamasyz etý», - dedi B. Saparbaev.
Qordai aýdanynda Úkimet komissiiasy Qordai, Masanchi, Aýqatty, Sortóbe eldi mekenderindegi qazirgi jaǵdaimen tanysyp, jergilikti turǵyndarmen, oqiǵa kezinde qaza tapqandardyń otbasylarymen birqatar kezdesý ótkizedi, zardap shekkenderge barady, turǵyn úilerdi, áleýmettik jáne kommertsiialyq nysandardy aralap kóredi.
