Úkimetten qurylǵan arnaiy komissiia «Bek Air» kompaniiasynyń ushaǵy apatqa ushyraǵan jerge keldi, dep habarlaidy "Ult aqparat" Azamattyq aviatsiia komitetine silteme jasap.
«2019 jylǵy 27 jeltoqsanda saǵat 07:22 - de Almaty-Nur-Sultan baǵyty boiynsha «Bek Eir» áýe kompaniiasynyń №Z2100 reisi ushyp kóterilý kezinde biiktikten aiyrylyp, betondy qorshaýdy syndyrǵan.
Ushaq Almaty oblysy Talǵar aýdany Gúldala jáne Ál-merek eldi mekenderiniń ortasyndaǵy ekiqabatty qurylys nysanyna soǵylǵan. Dereý qutqarý jumystary bastaldy, órt bolǵan joq. Oqiǵa ornyna meditsinalyq kómek kórsetý úshin 40 jedel járdem brigadasy jiberildi.
Almatyda qulaǵan ushaq isine qatysty QR Premer-Ministriniń tapsyrmasy boiynsha úkimettik komissiia quryldy. Komissiia quramynda QR Premer-ministriniń orynbasary R.Skliar, QR Indýstriia jáne infraqurylymdyq damý ministri j B.Atamqulov jáne basqa da memlekettik organdardyń ókilderi bar. Aldyn ala derekter boiynsha bortta 95 jolaýshy, 5 ekipaj múshesi bolǵan.
Áýe kemesiniń ushýǵa jaramdylyq sertifikaty 2019 jyldyń mamyr aiynda berilgen. Borttyń shyǵarylǵan ýaqyty 1996 jyldyń sáýir aiy. Qazaqstandyq reestrde 2016 jyldyń 26 tamyzynan tirkelip tur. Áýe kompaniiasyndaǵy Fokker-100 áýe kemesiniń sany -10, olardyń 9-y ushýǵa jaramdy.
Oqiǵanyń naqty sebepteri anyqtalyp jatyr.
Qazirgi ýaqytta Qazaqstannyń aviatsiia komitetiniń ákimshiligi «Bek Eir» áýe kompaniiasynyń ushaqtaryn toqtatty.
