Memleket basshysy elimizdiń kadrlyq áleýetin birtindep arttyrý mańyzdylyǵyna toqtaldy, dep habarlaidy "Ult aqparat".
Ekonomikany bilikti mamandarmen qamtamasyz etý – asa ózekti mindet. Eń aldymen, sý, energetika, qurylys jáne basqa da salalarda qatty baiqalyp otyrǵan kadr tapshylyǵyn joiý qajet. Sondai-aq bolashaqta suranysqa ie bolatyn kásipter úshin bilikti mamandar daiarlaý kerek. Bul baǵytta naqty jumystar bastaldy.
"Úkimet joǵary bilim salasyn halyqaralyq bilim berý keńistigimen yqpaldastyryp jatyr. Qazirdiń ózinde elimizde sheteldiń belgili 23 joǵary oqý orny jumys júrgize bastady. Olarǵa meilinshe qoldaý kórsetý kerek. Atap aitqanda, maman daiarlaýǵa beriletin memlekettik tapsyrysty birtindep kóbeitken jón. Bul tásildi bilim baǵdarlamasy zaman talabyna sai keletin óz oqý oryndarymyzǵa da qoldanýǵa bolady. Osy rette grant quny jastardy sapaly oqytýǵa múmkindik berýge tiis. Memleket qarjysyn ýniversitettiń bárine shashyratyp, ońdy-soldy tarata berýge bolmaidy. Úzdik ýniversitetterdiń naqty sektormen bailanysyn nyǵaitý kerek.
Innovatsiialyq saiasatty elimizdiń ǵylymi-tehnologiialyq basymdyqtarymen úilestirý qajet. Mundai qadam ár saladaǵy innovatsiiaǵa serpin beredi. Sondai-aq joǵary oqý oryndaryndaǵy qoldanbaly ǵylymnyń áleýetin arttyrady. Sonymen qatar ǵalymdardyń sheteldegi taǵylymdamasyn ánsheiin sinekýraǵa jáne "akademiialyq týrizmge" ainaldyrmaý kerek.
Joǵary oqý oryndary ǵana emes, tehnikalyq jáne kásiptik bilim berý mekemeleri de bilikti kadrlar daiarlaýy qajet. Úkimet kolledjde jaqsy oqyǵan túlekterdi mamandyǵy boiynsha memlekettik qyzmetke alý múmkindigin qarastyrýǵa tiis", - dedi Prezident.
