Qazaqstan Úkimeti 2026–2028 jyldarǵa arnalǵan kóleńkeli ekonomikaǵa qarsy keshendi is-qimyl josparyn bekitti. Qujat Memleket basshysynyń ekonomikalyq úderisterdiń ashyqtyǵyn arttyrý jónindegi tapsyrmalaryn oryndaý aiasynda ázirlenip, oǵan Premer-ministr Oljas Bektenov qol qoidy, dep habarlaidy ult.kz.
Jospardy Qarjy ministrligi múddeli memlekettik organdarmen birlesip daiyndaǵan. Onyń negizgi maqsaty – kóleńkeli ekonomikanyń úlesin azaitý, adal básekelestikti qamtamasyz etý, biznestiń ashyqtyǵyn kúsheitý jáne kásipkerlerge qosymsha ákimshilik júkteme túsirmei, biýdjet kirisin arttyrý.
Úkimettiń málimetinshe, sońǵy jyldary bul baǵytta birqatar nátije baiqalǵan. Atap aitqanda, 20 aqparattyq júie engizilip jáne jańǵyrtylyp, ainalymy 2 trln teńgege jetken internet-kazinonyń qarjylyq infraqurylymy toqtatyldy. Sondai-aq 360 mlrd teńge kólemindegi negizsiz biýdjettik shyǵynnyń aldyn alý múmkin boldy.
Osynyń nátijesinde kóleńkeli ekonomikanyń úlesi 2019 jylǵy jalpy ishki ónimniń 24 paiyzynan 2025 jyldyń qorytyndysy boiynsha 16,7 paiyzǵa deiin tómendegen. Endi jańa jospar aiasynda bul kórsetkishti 2028 jylǵa qarai JIÓ-niń 13,8 paiyzyna deiin qysqartý kózdelip otyr.
Jospardyń basty jańalyǵy – jasandy intellekt negizinde jumys isteitin biryńǵai tsifrlyq monitoring platformasyn iske qosý. Ol memlekettik organdardyń derekterin biriktirip, kóleńkeli ekonomika táýekelderin aldyn ala anyqtaýǵa jáne biýdjetke zalal keltiretin zań buzýshylyqtardyń jolyn kesýge múmkindik beredi.
Qujatta barlyǵy 53 is-shara qarastyrylǵan. Olar saýda, qurylys, kólik, aýyl sharýashylyǵy, densaýlyq saqtaý jáne bilim berý siiaqty táýekeli joǵary salalardy tsifrlandyrýǵa baǵyttalǵan.
Sonymen qatar Digital Bazaar platformasyn damytý, tsifrlyq tańbalaýǵa jatatyn taýarlar tizimin keńeitý, Ulttyq taýarlar katalogyn tolyqtyrý, elektrondyq kommertsiia men marketpleisterdi retteýdi jetildirý, memlekettik aqparattyq júielerdi integratsiialaý jáne «Tsifrlyq teńge» jobasyn keńinen paidalaný josparlanǵan.
Úkimet jańa keshendi jospar bizneske qosymsha ákimshilik talaptar engizbeitinin atap ótti. Negizgi basymdyq protsesterdi avtomattandyrýǵa, tsifrlandyrýǵa, jasandy intellekt pen zamanaýi analitikalyq quraldardy qoldanýǵa beriledi.
