Quryltai depýtaty Ashat Rahimjanov sapasyz janarmaidan kóligi búlingen azamattardyń shyǵynyn óteý tetigin engizýdi usyndy. Bul týraly ol Premer-ministr Oljas Bektenovke joldaǵan depýtattyq saýalynda aitty, dep habarlaidy ult.kz.
Depýtattyń sózinshe, sońǵy ýaqytta AI-95 jáne AI-98 benzininiń sapasyna qatysty shaǵym kóbeigen. Keibir júrgizýshiler janarmai quiǵannan keiin kóliginiń qymbat bólshekteri isten shyǵyp, jóndeýge 200–600 myń teńge jumsaýǵa májbúr bolǵan.
Tehnikalyq retteý jáne metrologiia komitetiniń málimetinshe, 2026 jyly júrgizilgen baqylaý barysynda janarmaidy almastyrý faktileri anyqtalǵan. Máselen, Almatyda AI-100 retinde satylǵan ónimdegi kúkirt mólsheri normadan úsh eseden astam joǵary bolǵan. Al Qyzylorda oblysynda AI-95 markasymen AI-92 benzini satylǵan.
Osyǵan bailanysty depýtat janarmai sapasyn baqylaýdy kúsheitýdi usyndy. Onyń bastamalarynyń biri – janarmai beketterinde QR-kod engizý. Ol arqyly tutynýshy ónimniń qaidan kelgenin jáne zerthanalyq tekserý nátijesin satyp alǵanǵa deiin kóre alýy kerek.
Sondai-aq depýtat sapasyz janarmaidan kóligi búlingen azamattardyń shyǵynyn óteýdiń naqty tetigin engizýdi usyndy. Bul rette janarmai sapasy men kólikke kelgen zalal arasyndaǵy bailanysty dáleldeýdi jeńildetý kózdelip otyr.
Rahimjanovtyń aitýynsha, janarmai sapasyna baqylaý tek zaýyttan shyqqan kezde emes, ónim tutynýshyǵa jetkenge deiingi barlyq kezeńde júrgizilýi qajet.
