Foto ©Nurǵisa Eleýbekov
Halyqtyń eńbek etýden túsetin tabysynyń úlesi sońǵy 10 jylda 10,8 paiyzdyq tarmaqqa tómendedi. Bul týraly Úkimet otyrysynda QR Ulttyq ekonomika ministri Álibek Qýantyrov aitty, dep habarlaidy QazAqparat.
«Osy jylǵy 11 qańtarda Memleket basshysy Májilis otyrysynda sóilegen sózinde halyqtyń jumyspen qamtylýy men tabysynyń tómendigi problemalaryna toqtalyp, Halyqtyń tabysyn arttyrý baǵdarlamasyn ázirleýdi tapsyrdy. Osy tapsyrmany oryndaý maqsatynda Ulttyq ekonomika ministrligi memlekettik organdarmen, Ulttyq kásipkerler palatasymen jáne sarapshylyq qaýymdastyqpen birlesip, kedeishilik pen jumyssyzdyq deńgeii boiynsha naqty jaǵdaiǵa taldaý júrgizip, baǵdarlama jobasyn ázirledi. Taldaý nátijeleri boiynsha turaqty oń dinamikaǵa qaramastan, sońǵy eki jylda halyqtyń naqty aqshalai tabysynyń ósý qarqyny 2019 jylǵy 6,4 paiyzdan 2021 jyly 2,9 paiyzǵa deiin baiaýlaǵany aiqyndaldy», - dedi ministr.
Sonymen qatar ol halyq tabysynyń qurylymynda eńbek etýden túsetin kiristerdiń tómendeýi jáne áleýmettik transfertterden kiristerdiń ósýi baiqalatyndyǵyn aitady.
«Halyqtyń eńbek etýden túsetin tabysynyń úlesi sońǵy 10 jylda 10,8 paiyzdyq tarmaqqa tómendedi. Óz kezeginde, áleýmettik transfertterdiń úlesi kerisinshe, 10 paiyzdyq tarmaqqa ósti.
Júrgizilgen taldaýdy eskere otyryp, Halyqtyń tabysyn arttyrý baǵdarlamasynda myna basymdyqtar belgilendi:
- jumysshy jastar;
- halyqtyń áleýmettik osal toptarynyń jekelegen sanattaryn jumysqa ornalastyrý; - biýdjet jumyskerlerine laiyqty jalaqy;
- eńbek kirisindegi teńgerimsizdikterdi joiý;
- aýyl sharýashylyǵynda, óńdeý ónerkásibinde tiimdi jumyspen qamtýdy damytýdy yntalandyrý;
- kásipkerlik kiristiń ósýin yntalandyrý;
- tabystyń satyp alý qabiletin qorǵaý», - dedi ol.
Ministrdiń atap ótýinshe, Úkimettiń búkil ekonomikalyq saiasatynyń jalpy maqsaty halyq tabysyn arttyrý bolǵandyqtan, baǵdarlama ulttyq jobalarmen ózara bailanysty. Baǵdarlama aiasyndaǵy is-sharalardy shartty túrde tikelei jáne janama dep bólýge bolady. Tikelei is-sharalar biýdjet jumyskerleriniń jalaqysyn kóterýge jáne kiristerdegi teńgerimsizdikti teńestirýge, al janama is-sharalar halyqty jumyspen qamtýǵa járdemdesý, kásiptik daiarlaý (qaita daiarlaý), óńdeýshi kásiporyndardyń ónimdiligin arttyrý jáne kásipkerlikti damytý arqyly tabystyń ósý múmkindikterin keńeitýge baǵyttalǵan.
«Baǵdarlama 80 is-sharadan turady. Olar mynadai negizgi baǵyttarǵa bólingen: halyqtyń eńbek tabysynyń artýy; keń aýqymdy jumyspen qamtýdy damytý arqyly halyqtyń tabysyn arttyrý; satyp alý qabiletin qorǵaý», - dedi Álibek Qýantyrov.
