575 mlrd teńge qosymsha shyǵystar azamattar men ekonomikany qoldaýǵa jumsalady. Bul týraly QR Premer-ministriniń birinshi orynbasary - Qarjy ministri Álihan Smaiylov aitty, dep habarlaidy QazAqparat.
«Respýblikalyq biýdjettiń salyq kiristeriniń tómendeýin óteýge jáne tiisti memlekettiń barlyq áleýmettik mindettemelerin oryndaýǵa 1,7 trln teńge bólinedi. Ekonomikanyń zardap shekken sektorlaryndaǵy shaǵyn jáne orta biznes sýbektileri men iri biznes ókilderiniń eńbek aqy tóleý boiynsha salyqtar men alymdardy tóleýden bosatylýyna bailanysty jergilikti biýdjetterdiń shyǵyndaryn óteýge 237 mlrd teńge qarastyrylǵan», - dedi ol.
Onyń atap ótýinshe, 313 mlrd teńge áleýmettik tólemderdiń, iaǵni, zeinetaqylar, járdemaqylar, ataýly áleýmettik kómek 10 paiyzǵa deiin qosymsha indeksteýge, stipendiiany deńgeiin arttyrýǵa jáne turǵyndardyń kommýnaldyq qyzmetteriniń aqysyn tóleýge jumsalady. Agroónerkásiptik keshendi damytý, «Eńbek», «Biznestiń jol kartasy – 2025», «Aýyl – el besigi» baǵdarlamalardy keńeitýge 240 mlrd teńge baǵyttalady.
«Epidemiiaǵa qarsy is-sharalardy júrgizýge 125 mlrd teńge, onyń ishinde meditsinalyq jáne basqa qyzmetkerlerge qosymsha aqy tóleý, halyqtyń az qamtylǵan topttaryna azyq-túlik-turmystyq jiyntyqtarmen qamtamasyz etý qarastyrylǵan. 575 mlrd teńge qosymsha shyǵystar azamattar men ekonomikany qoldaýǵa, onyń ishinde Memleket basshysynyń tapsyrmalaryn iske asyrýǵa baǵyttalady. Osy qarajattar aiasynda Nur-Sultan qalasyndaǵy úlestik qurylystyń problemalyq nysandaryn aiaqtaýǵa arnalǵan shyǵystar, aiyrbas baǵamynyń ózgerýine bailanysty shyǵystar jáne basqa da shyǵystar kózdelgen», - dedi Álihan Smaiylov.
