QR Premer-Ministriniń orynbasary Eraly Toǵjanov QR Aqparat jáne qoǵamdyq damý ministrligine qatysty tapsyrmalardy málim etti, dep habarlaidy "Ult aqparat".
«2021 jylǵa arnalǵan basymdyqty baǵyttar bar. Bul baǵyttar ministrlik qyzmetinde atqarylatyn basty jumystar bolady. Birinshiden, Memleket basshysy «halyq únine qulaq asatyn memleket» tujyrymdamasyn ary qarai júzege asyrý boiynsha naqty mindetti júktedi», - dedi Toǵjanov atalǵan ministrliktiń keńeitilgen alqa májilisinde.
Onyń sózine qaraǵanda, bul baǵytta qoǵamdyq baqylaý týraly zań jobasyn ázirleý mańyzdy qadam retinde belgilendi.
«Bul másele boiynsha qazirgi kezde tyńǵylyqty jumystar júrip jatyr. Ministrlik qoǵammen tyǵyz bailanysta jumys istep, osy baǵytta usynylǵan pikirlerdi eskerý kerek. Bul mańyzdy joba boiynsha sizdermen, sondai-aq depýtattyq korpýspen birlese jumys isteimiz. Birqatar másele boiynsha talqylaý júrip jatyr, sondyqtan ministrlik osyǵan erekshe nazar aýdarýy tiis», - dedi Eraly Toǵjanov.
