Premer-ministr Á.Smaiylov Memleket basshysynyń elimizdi qarqyndy túrde damytý, ekonomikanyń turaqtylyǵy men básekege qabilettiligin arttyrý jáne halyqtyń turmys deńgeii men ál-aýqatyn jaqsartý jóninde asa aýqymdy mindetter qoiýyna bailanysty birqatar máselege nazar aýdardy, - dep habarlaidy Tengrinews.kz tilshisi.
Úkimet basshysy Ulttyq ekonomika ministrligi men Ulttyq bankke tapsyrma berdi.
"Memleket basshysy daǵdarysqa qarsy sharalar paketin tez arada júzege asyrýdy tapsyrdy. Daǵdarysqa qarsy sharalar ekonomikany qoldaýǵa, infliatsiiany baqylaýdy kúsheitýge, valiýta naryǵyn turaqtandyrýǵa, jańa jumys oryndaryn qurýǵa, sondai-aq kásipkerlikti damytýǵa baǵyttalǵan. Osyǵan bailanysty Ulttyq ekonomika ministrligi men Ulttyq bank jaýapty memlekettik organdarmen birlese otyryp, daǵdarysqa qarsy jospardy 25 naýryzǵa deiin engizýdi tapsyramyn", - dedi ol.
Premer-ministr óńirlerdi damytýǵa qatysty Ulttyq ekonomika ministrligine jol kartasyn engizýdi tapsyrdy.
"Joldaýdyń negizgi basymdyqtarynyń biri - aimaqtardy damytý isine tyń serpin berý. Abai, Ulytaý jáne Jetisý oblystarynyń qurylýy osy óńirlerdiń áleýmettik-ekonomikalyq damýyn jańa deńgeige kóterip, jergilikti turǵyndardyń problemalaryn jedel sheshýge múmkindik beredi. Osy rette, Úkimettiń aldynda Memleket basshysynyń tapsyrmasyn nátijeli iske asyrý mindeti tur. Bul úshin óńirlerdi qarjylandyrý tártibin qaita qarap, biýdjetaralyq qatynastardyń ońtaily modelin ázirleý qajet. Sondai-aq, óńirler úshin memlekettik satyp alý tártibin jeńildetý máselesin pysyqtaý kerek. Jańa oblystardy qurý boiynsha jumystardy jedel uiymdastyrý úshin Ulttyq ekonomika ministrligine múddeli memlekettik organdarmen birlese otyryp, bir aptada tiisti jol kartasyn engizýdi tapsyramyn", - dedi Úkimet basshysy.
Sonymen qatar, azyq-túlik máselesi týraly pikir bildirdi.
"Qazirgi kúrdeli kezeńde elimizdiń azyq-túlik qaýipsizdigin qamtamasyz etýdiń mańyzy zor. Memleket basshysy egis naýqanyn erekshe baqylaýǵa alýdy tapsyrdy. Aýyl sharýashylyǵy ministrligi kóktemgi egis jumystaryn júrgizý jónindegi jedel shtabta sharýalardy tuqymmen, tyńaitqyshtarmen, janar-jaǵarmaimen, tehnikamen jáne sýmen qamtamasyz etýge kúndelikti monitoring júrgizýi tiis. Sondai-aq, turaqtandyrý qorlaryna aýyl sharýashylyǵy ónimderin satyp alý úshin forvardtyq kelisimsharttardy ýaqytyly bekitý boiynsha ákimdikterdiń jumysyn úilestirýdi tapsyramyn. Barlyq qabyldanǵan shara baǵanyń ósýin tejeýge oń yqpal etýi tiis. Halyq bizden osyny kútip otyr. Sonymen qatar, qazirgi boljam boiynsha keibir óńirlerde jaýyn-shashyn az bolýy múmkin. Sondyqtan qajet sheshimder qabyldandy. Sýmen qamtamasyz etý máselesin erekshe baqylaýda ustaý qajet. Biz byltyrǵydai mal azyǵynyń tapshylyǵyna jol bermeýimiz kerek. Biyl ákimdikterge jemshóp egis alqaptaryn ulǵaitýdy tapsyramyn. Sondai-aq, egis jumystarynyń barysy, áleýmettik mańyzy bar azyq-túlik ónimderiniń jetkilikti qory týraly Aýyl sharýashylyǵy ministrligi men ákimdikter halyqty keńinen habardar etýi kerek. Aýyl sharýashylyǵy óndirýshilerine sýbsidiia berý jumystaryn da jariialap otyrý qajet", - dedi ol.
Úkimet basshysy Prezident Joldaýynyń máni týraly pikir bildirdi.
"Túptep kelgende, Joldaýdyń negizi máni – halqymyzdyń amandyǵy men eldiń órkendeýi. Úkimet árbir azamattyń óz múmkindigin tolyq iske asyrýy men qajyrly eńbeginiń laiyqty baǵalanýy úshin qajetti sharalardy qabyldaidy. Biz qoǵammen ózara bailanys aýqymyn keńeitip, halqymyzdyń birligin nyǵaitý jóninde úlken jumystar júrgizýimiz qajet. Sondyqtan Aqparat ministrligi osy baǵytta belsendi jumystardy iske asyrýy kerek. Geosaiasi syn-qaterler jaǵdaiynda otandyq buqaralyq aqparat quraldarynyń rólin arttyrýǵa airyqsha mańyz berilip otyr. Osyǵan bailanysty Prezident "Buqaralyq aqparat quraldary týraly" zańdy qaita qaraýdy tapsyrdy. Bul zańdy jýrnalister jáne sarapshylar qaýymymen aqyldasa otyryp, qabyldaýmyz qajet. Aqparat ministrine osy jumysty tiianaqty ári joǵary deńgeide uiymdastyrýdy tapsyramyn. Úkimet músheleri jýrnalistermen tyǵyz bailanysta jumys isteýi tiis. Ashyq jumys qana qoǵamnyń Úkimetke degen senimin qalyptastyrady. Sol úshin Memleket basshysynyń Joldaýynda aitylǵan tapsyrmalardyń oryndalý barysy týraly azamattardy turaqty túrde habardar etip otyrý qajet", - dedi Smaiylov.
Premer-ministr Joldaýda aitylǵan mindetterdi iske asyrý úshin usynylyp otyrǵan reformalardy zańnamalyq qamtamasyz etý boiynsha aýqymdy jumys júrgizý keregin aitty. Sondyqtan Ádilet ministrligi osy jumystardy úilestirip, keiin Parlamentke engizý úshin memlekettik organdarmen birlesip, barlyq zań jobasyn daiyndap talqylaýǵa qazirden bastap kirisýi qajet ekenin jetkizdi.
