Búgin Ońtústik Qazaqstan oblysyna jumys sapary aiasynda QR Premer-Ministri Baqytjan Saǵyntaev óńir jurtshylyǵynyń qatysýymen týrizm men kásipkerlikti damytý, jumyspen qamtý men eńbek resýrstarynyń mobildiligin arttyrý máseleleri boiynsha keńes ótkizdi, dep habarlady PrimeMinister.kz saitynan.
Sharaǵa memlekettik organdardyń, OQO ákimdiginiń basshylary, óńirler ákimderiniń orynbasarlary, salalyq qaýymdastyqtardyń ókilderi, jumyspen qamtý ortalyqtarynyń direktorlary, UKP, úkimettik emes uiymdar jáne BAQ ókilderi qatysty.
OQO ákimi Janseiit Túimebaev týrizmdi damytý jóninde baiandama jasady. QR Ulttyq ekonomika ministri Timýr Súleimenov QR Úkimetiniń elimizde kásipkerlikti damytý boiynsha atqaryp jatqan sharalary týraly baiandady. QR Eńbek jáne halyqty áleýmettik qorǵaý ministri Tamara Dúisenova jumyspen qamtý jáne ishki kóshi-qondy yntalandyrý sharalary týraly aityp berdi. QR Bilim jáne ǵylym ministri Erlan Saǵadiev «Serpin» áleýmettik jobasyn iske asyrý týraly esebin usyndy. QR Mádeniet jáne sport ministri Arystanbek Muhamediuly týristik salany damytýdyń keleshegi men qazirgi syn-tegeýrinderi taqyrybynda sóz qozǵady.
Keńes aiasynda «OQO týrizm indýstriiasyn damytý ortalyǵy» qaýymdastyǵynyń prezidenti Gúlmira Aqberdieva, BUU kóshi-qon agenttigi uiymynyń Ortalyq Aziia boiynsha úilestirýshisi Deian Keserovich, SQO ákiminiń orynbasary Asqar Saqypkereev, ShQO ákiminiń birinshi orynbasary Nurymbet Saqtaǵanov, sondai-aq Ońtústik Qazaqstan oblysynan Soltústik Qazaqstan oblysyna qonys aýdarǵan, Ónimdi jumyspen qamtý jáne jappai kásipkerlikti damytý baǵdarlamasynyń qatysýshysy Serik Janáliev sóz sóiledi.
Sondai-aq, keńes qatysýshylary «Uly Jibek jolynda» biryńǵai týristik jobany iske asyrý keleshegi jáne eńbekke jumyldyrý máseleleri týraly pikir almasty.
Shara barysynda ótken jyldyń jeltoqsan aiynda Úkimet Memleket basshysynyń tapsyrmasy boiynsha Ónimdi jumyspen qamtý jáne jappai kásipkerlikti damytý baǵdarlamasyn qabyldaǵany týraly aitylyp ótti. Onda jumyssyz jáne ózin-ózi jumyspen qamtyǵan halyqty eńbek naryǵynda suranysqa ie kásibi daǵdylarǵa jappai oqytýǵa negizgi basymdyq berildi. Onymen qosa, baǵdarlama eńbekke jumyldyrýdy arttyrý máselesin de qamtidy.
Budan ózge, óńirlerdi ekonomikalyq damytýdaǵy ózekti jaǵdailardy eskere otyryp, ishki kóshi-qon jaǵdaiyn jańartýǵa baǵyttalǵan Kóshi-qon saiasatynyń tujyrymdamasy qabyldandy.
Úkimet biznesti damytý men qoldaý kórsetý turǵysynan jaǵdaidy erekshe baqylaýda ustaýda, sonyń ishinde Ulttyq kásipkerler palatasynyń túrli alańdarda, QR Premer-Ministriniń el aimaqtary boiynsha jumys saparlary barysynda kótergen máseleleri Júielik problemalar tizimine engizilgen. Atalǵan tizim 513 máseleden turady, olardyń 442-siniń búginde sheshimi tabylǵan, qalǵan máseleler boiynsha pysyqtaý jumystary júrgizilip jatyr.
Sonymen qatar damytýdyń perspektivaly baǵyttarynyń biri retinde týrizm salasy atalyp ótti.
Anyqtama:
QR týristik salasyn damytýdyń 2020 jylǵa deiingi tujyrymdamasynyń jobasynda 6 týristik klasterdi qurý kózdelip otyr. Onda OQO «Uly Jibek jolyn qaita jandandyrý» klasterine kiredi.
Oblystyń atalǵan klasterine Túrkistan qalasy, Otyrar jáne Saryaǵash aýdandary, «Aqsý-Jabaǵyly» jáne «Qarataý» qoryqtary, «Sairam-Ógem» memlekettik ulttyq tabiǵi parki kiredi.
Qorytyndylai kele, aitylǵan sharalardyń barlyǵy oblystyń ekonomikalyq áleýetin damytýǵa qajetti jaǵdailardy jasaýǵa baǵyttalǵany jáne júieli negizde iske asyrylatyny atalyp ótti.
