- Úkimettiń búgingi otyrysynda Premer-Ministrdiń birinshi orynbasary Asqar Mamin Resei Federatsiiasynyń qazaqstandyq kómirdi satyp alý kólemin azaitatyndyǵyn, degenmen, Ekibastuz kómirin kórshi Qytai eline satýǵa bolatyndyǵyn jetkizdi, dep xabarlaidy Ult.kz tilshisi QazAqparat agenttigine silteme jasap.
"Árine, bizge osy salada bolyp jatqan ózgeristerdi eskerip otyrý qajet. Máselen, kórshi Resei 2030 jylǵa deiin kómir óndirisin 400 mln. tonnadan 500 mln.-ǵa deiin arttyrýdy josparlap otyr. Oǵan qosa, Ekibastuz kómirin óz kómirimen almastyramyz dep jatyr. Osynyń bári qazaqstandyq shikizattyń eksportyn qysqartýy ábden múmkin. Sondyqtan bizge jańa naryqtardy izdeý kerek. Kóliktik-logistika jaǵyn da aldyn ala oilastyryp qoiǵan jón. Osy oraida, Qytaidyń kómir importyn 200 mln. tonnaǵa deiin arttyryp otyrǵanyn atap ótý kerek. Osyny zerdelep, shekara jaqyn aimaqtardan kómir jetkizý máselesin qarastyrýǵa bolady", - deidi Mamin.
Degenmen, Úkimet basshysy Baqytjan Saǵyntaev aldymen ekologiialyq máselelerdi eskerý kerektigin jetkizdi. "Ekibastuzdy bárimiz jaqsy bilemiz. Ol jaqta bolǵandar ekologiiasyn da kórgen. Osy oraida naqty bir sharalardy, sonyń ishinde kómir ximiiasyn damytýdy qolǵa alǵan durys. Kómir plasttarynan metandy alý asa mańyzdy. Sol úshin búgin mamandardy shaqyryp otyrmyz. Oladyń pikirin tyńdaiyq, tájiribesin zerdeleiik dep, arnaiy shaqyrdyq. Sebebi siz, Asqar Uzaqbaiuly, jana Qytaidyń kómir importyn ulǵaitqany jaiynda aityp otyrsyz ǵoi. Meniń bilýimshe, Qytai úkimeti 2020 jylǵa deiin kómir óndirisin 500 mln. tonnaǵa deiin azaitýdy josparlap otyr. Olar ekologiiaǵa bailanysty osyndai sharalardy qolǵa aldy. Sondyqtan osyny áli de zerdeleý kerek", - dep atap kórsetti Saǵyntaev.
