Búgin Memleket basshysynyń tapsyrmasymen QR Premer-Ministri Baqytjan Saǵyntaev jumys saparymen Batys Qazaqstan oblysyna jumys saparymen keldi, dep habarlaidy "Ult aqparat".
Sapardyń maqsaty — Prezidenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» joldaýlarynyń, «Bes áleýmettik bastamanyń», sondai-aq memlekettik jáne salalyq baǵdarlamalardyń óńirde iske asyrylý barysymen tanysý.
Jumys saparynyń kestesindegi alǵashqy nysan álemdegi eń iri kásiporyndardyń biri — Qarashyǵanaq munai-gaz kondensat ken orny boldy. Ol 280 kv km astam aýmaqty qamtidy. Óndirý kórsetkishteri respýblikadaǵy barlyq gaz óndirýdiń shamamen 45% jáne suiyq kómirsýtekterdiń jalpy óndirisiniń shamamen 16% quraidy, al jalpy baǵalaý qorlary 2,4 mlrd barrelden astam kondensat jáne 16 trln tekshe fýt gazdy quraidy.
Aralaý barysynda Premer-Ministr B. Saǵyntaev kómirsýtek óndirisiniń tehnologiialyq úderisimen tanysty. «Qarashyǵanaq Petroliým Opereiting B.V» kompaniiasynyń bas direktory Edvin Blom kásiporynnyń negizgi nátijeleri týraly baiandady. Qarashyǵanaq 12 mlrd barrel suiyq kómirsýtek pen 57 trln tekshe fýt gazdy qamtidy, olardyń shamamen 11% qazirgi tańǵa deiin óndirildi. E. Blom Qarashyǵanaqty igerýdiń 21 jyly respýblika boiynsha barlyq ónerkásiptik kásiporyndar 42% qamtamasyz etildi, bul ken ornyn odan ári igerýdiń úlken keleshegi bar ekenin dáleldeidi.
Onyń aitýynsha, QPO ónerkásiptik qaýipsizdik, eńbekti jáne qorshaǵan ortany qorǵaý máselelerine erekshe nazar aýdara otyryp, jaqsy óndiristik kórsetkishterdi turaqty kórsetýde.
«Bizdiń ekologiialyq kórsetkishterimiz álemdik deńgeige sai keledi. Ekologiialyq qaýipsizdiktiń óte qatań standarttary óndiriste ǵana emes, sondai-aq, keń aýqymda da saqtalýda. Osymen ekinshi jyl qatarynan biz Oralda ekologiialyq forým uiymdastyrdyq, oǵan biz ekologiialyq qaýipsizdikti arttyrý máselelerin talqylaý úshin tek QPO qyzmetkerlerin ǵana emes, sonymen qatar merdigerlerdi de shaqyramyz. Óitkeni, búgingi kúni kórsetkishter jaqsy bolǵanymen, aldaǵy kúnderi olar jetkilikti túrde jaqsy bolmaýy múmkin. Qorshaǵan orta ózgerip jatyr», — dedi Edvin Blom.
Budan ózge, Baqytjan Saǵyntaevqa Qarashyǵanaq ken ornyn paidalanýdy keńeitý jáne merzimin uzartý qondyrǵylarynyń jumysy týraly tolyǵyraq baiandaldy. Búginde munai negizinen Qara teńizdegi «Ońtústik Ozereevka» portyna aparatyn KQK qubyr jelisi arqyly eksporttalady. Munaidy satýdyń taǵy bir baǵyty — «Transneft» kompaniiasynyń kólik júiesimen bailanysatyn «Atyraý–Samara» qubyry arqyly jetkiziledi, ol Primorsk portyna jáne birqatar eýropalyq baǵyttarǵa qoljetimdilikti qamtamasyz etedi.
Kásiporyndy tehnologiialyq jańǵyrtý jáne Indýstriia 4.0 elementterin engizý týraly aita otyryp, QPO bas direktory búginde konsortsiým aktsionerleri Qarashyǵanaq ken ornyn igerýge $23 mlrd astam investitsiia salǵanyn aitty. Ken ornyn igerý kezinde eń ozyq tehnologiialar paidalanylady. Bul maksimaldy ekonomikalyq kiris alýmen jer qoinaýyn tiimdi paidalanýǵa múmkindik beredi. Sonymen qatar QPO basshylyǵy tehnologiialyq jabdyqtardy qoldaýǵa odan ári investitsiia salýǵa nietti.
«Qazirgi tańda el Prezidenti atap ótken tsifrlandyrý josparlary joǵary qulshynys týdyrady. Qaýipsizdik, ekologiialyq jaýapkershilik, adam kapitaly jáne t.b. máselelerdi qamtityn birqatar bastamalardy kórip otyrmyz. QPO onsyz da joǵary tehnologiialyq kásiporyn, degenmen, tsifrlandyrý – bul asa damýshy innovatsiialar, sondyqtan da jergilikti qyzmetkerlerdi únemi damytyp otyrý kerek», — dedi E. Blom, jergilikti taýar óndirýshilerdi qoldaý QPO-nyń negizgi basymdyqtarynyń biri ekenin jetkize otyryp.
Budan ózge, QPO Batys Qazaqstan oblysy turǵyndarynyń qajettilikteri úshin elektr energiiasyn jetkizedi. Osy maqsattar úshin gaz-týrbinalyq elektr stantsiiasy jumys isteidi, onyń negizgi maqsaty — ken ornynyń jáne jaqyn mańdaǵy eldi mekenderdiń barlyq óndiristik keshenin óziniń elektr qýatymen qamtamasyz etý.
QR Premer-Ministri Baqytjan Saǵyntaev «Kondensat» AQ zaýytynda munai men gazdy óńdeýdiń tehnologiialyq tizbegi jumysynyń jalǵasymen tanysty. Munda Memleket basshysynyń qatysýymen ótken telekópir aiasynda K5 ekologiialyq sanatynyń benzinin shyǵarý iske qosyldy.
«Kondensat» AQ Direktorlar keńesiniń tóraǵasy V. Júnisov zaýytty jańǵyrtý jumystary týraly, sondai-aq óndiristi avtomattandyrý jáne tsifrlandyrý boiynsha qabyldanǵan sharalar týraly aityp berdi. 2017 jyly zaýyt jylyna 850 myń tonnaǵa deiin kásiporynnyń qýattylyǵyn arttyra otyryp jańǵyrtyldy. Budan ózge, 2018 jyldyń maýsym aiynda dizel otynyn K5 ekologiialyq sanatyna deiin gidrotazartatyn qondyrǵy iske qosyldy. Jalpy, zaýytty rekonstrýktsiialaýǵa barlyǵy $200 mln astam investitsiialar tartyldy.
Atalǵan jańǵyrtý jumystary elimizdiń ishki naryǵyndaǵy motor otyndarynyń tapshylyǵyn jabýǵa múmkindik berdi, sondai-aq biýdjetke aktsizder men basqa da salyq tólemderiniń túsimin ulǵaitty. Sonymen qatar, zaýyt joǵary bilikti jumys oryndaryn asha otyryp, oblystyń 1000-nan astam turǵynyna (kásiporyn qyzmetkerleri men olardyń otbasylaryna) laiyqty tabys ákeledi. Jańa benzin qondyrǵylary iske qosylǵan sátten bastap K5 joǵary ekologiialyq sanatynyń 80 myń tonnadan astam benzini shyǵaryldy. Osy kezeńde oblystyq biýdjetke shamamen 1 mlrd teńge aktsiz tólendi.
Zaýytta óndiriletin joǵary oktandy benzin men dizel otyny Batys Qazaqstan oblysynda ǵana emes, jaqyn mańdaǵy oblystarda da satylady. Budan ózge, shyǵarylǵan ónimniń jartysy shetelge eksporttalady. Máselen, vakýýmdyq gazoil Belarýske eksporttalady, al gýdrondy satý Reseige baǵyttalǵan.
Batys Qazaqstan oblysy elimiz úshin mańyzdy ónerkásiptik mánge ie. Óńirde munai-gaz óndirý, munai ónimderin óńdeý, mashina jasaý, metallýrgiia, qorǵanys, taý-ken ónerkásibi, tigin jáne azyq-túlik ónerkásibi kásiporyndary bar. 2018 jyldyń qańtar–maýsym ailarynda ónerkásiptik óndiris kólemi 1184,6 mlrd teńgeni qurady. Naqty kólem indeksi 2017 jylǵy sáikes kezeńniń 98,6%-yn qurady. IIDMB jáne Indýstriialandyrý kartasy aiasynda 2018 jyly 7 mlrd teńgege 262 jumys ornyn qurýmen 7 joba iske asyrylýda.
Sondai-aq, jumys sapary barysynda Premer-Ministr B. Saǵyntaev birqatar óndiristik jáne áleýmettik infraqurylym nysandaryn aralap, oblys aktivterimen jáne biznes ókilderimen jobalyq basqarý máseleleri jóninde kezdesý ótkizedi.
Atap aitqanda, «Oral — Tasqala — Ozinki RF shekarasy» jáne «Qaztalov — Jánibek — Bókei ordasy» avtojoldarynyń qurylys barysy tekseriledi. Bul baǵyttar aýdan ortalyqtarynyń oblys ortalyǵymen qatynasyn damytady. Munda Premer-Ministr Qaztalov, Jánibek jáne Bókei orda aýdandarynyń ókilderimen «Nurly jol» memlekettik baǵdarlamasyn iske asyrý barysyn talqylaidy.
Budan keiin Premer-Ministr «Nurly jer» baǵdarlamasy boiynsha turǵyn úi qurylysynyń barysyn tekserýge jáne «7–20–25» baǵdarlamasynyń iske asyrylý barysymen tanysý úshin Zashaǵan kentine barady.
B. Saǵyntaev mamandandyrylǵan Halyqqa qyzmet kórsetý ortalyǵynda memlekettik qyzmetterdi avtomattandyrý protsesimen jáne «Tsifrlyq Qazaqstan» memlekettik baǵdarlamasynyń óńirlik jobalarynyń iske asyrylýymen tanysady.
Premer-Ministrdiń jumys sapary oblys aktivimen jáne biznes ókilderimen ótetin keńespen aiaqtalady, onda jobalyq basqarý máseleleri talqylanyp, osy jyldyń 6 aiyndaǵy jumystardyń qorytyndylary shyǵarylyp, Prezidenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» joldaýlarynda, «Bes áleýmettik bastamasynda» berilgen mindetterdi odan ári sheshýge qatysty josparlar qaralady.
Eske sala keteiik, Baqytjan Saǵyntaev Memleket basshysynyń tapsyrmasymen elimizdiń óńirlerin jumys saparymen aralap júr. Buǵan deiin Atyraý, Qaraǵandy, Qostanai, Qyzylorda, Mańǵystaý, Ońtústik Qazaqstan, Aqmola, Aqtóbe oblystaryna baryp qaitty.
.jpeg)