8 sáýirge qaraǵan túni Qytai biligi virýs oshaǵy sanalatyn Ýhan qalasyn ashty. Hýbei provintsiiasynyń ortalyǵy qańtar aiynan beri tolyq izoliatsiiada bolǵan. Resmi aqparatqa sáikes, 7 sáýirde munda eshkimnen virýs tabylmaǵan.
Karantin kezinde bilik barlyq oqý oryndaryn jaýyp, qoǵamdyq kólikti toqtatty. Turǵyndar ruqsatsyz qaladan shyǵa almaǵan.
Hýbei provintsiiasynda karantindik sharalardyń alynatyny týraly aqparat naýryz aiynyń sońynda taraǵan. Qazir turǵyndar provintsiia aýmaǵynan shyǵa alady. Jaqyn arada áýe qatynasy qaita qalpyna keledi dep aitylady.
Ýhan qalasynyń soltústik bóligindegi Fýhe tóleý beketinde kólik ieleri dabyldy asyǵa kútip, qaladan shyǵýǵa asyqty.
Ýhanda jeke biznesi bar Go Lei kóligimen tóleý ornyna saǵat 20:40 shamasynda kelgen. Onymen birge kólikte taǵy alty adam bar. Olardyń barlyǵy úiine qaitatyn kúndi kútip júrgen.
«Men úige oralýdy taǵatsyz kútýdemin», - deidi Go Lei.
Ol - eldiń shyǵysyndaǵy Shandýn provintsiiasynyń týmasy.
«Ýhanda segiz jyldan beri turyp jatyrmyn. Kóktem merekesi kezindegi demalysta týystarym qalaǵa kelip, maǵan qajetti zattardy jetkizýge kómektesti. Epidemiia saldarynan barlyǵymyz osynda qalyp qoidyq», - deidi ol.
Aita keteiik, ótken jyly jeltoqsan aiynyń sońynda Qytaida koronavirýstyń jańa túri tarai bastaǵan. Epidemiia bastalǵan ýaqyttan beri 82 myńnan astam adamǵa virýs juqqan. 3300-den astam adam kóz jumǵan. Keibir sarapshylar Pekin koronavirýs juqtyrǵandar sany men kóz jumǵandar sanyn tómendetip kórsetedi dep sanaidy.
Álemde koronavirýs juqtyrǵandar sany 1,5 mln adamǵa jetti. 81 myńnan astam adam kóz jumdy.
