«Oskar» júldesin tapsyrý saltanatynda júrgizýshi Kris Rokty uryp jibergen Ýill Smit Amerika kinematografiialyq óner jáne ǵylym akademiiasynan shyǵatynyn málimdedi, dep habarlaidy QazAqparat CNN-ge silteme jasap.
Bul keleńsizdikten keiin atalǵan uiym akterdiń tártibi qaralatynyn jariialaǵan bolatyn.
«Smit Akademiianyń tártip standarttaryn buzdy. Biz onyń máselesin 18 sáýirge josparlanǵan direktorlar keńesi otyrysynda qaraimyz», - degen edi Akademiia prezidenti Devid Rýbin.
Munan soń akter uiym quramynan óz erkimen shyǵatynyn jáne basqarma qabyldaǵan kez kelgen sheshimdi qabyldaitynyn málim etti.
«Oskardyń» 94-saltanatyndaǵy qylyǵym jaǵa ustatarlyq boldy. Keshirilmeitin jait. Krisqa ǵana emes, onyń otbasyna, meniń kóptegen dostarym men jaqyndaryma, saltanatqa jinalǵandarǵa – aýqymdy aýditoriiaǵa aýyr tidi. Akademiianyń senimin aqtamadym. Jetistikterimen kózge túsken ózge nominanttardyń merekelik kóńil kúiin buzdym», - deidi ol.
Aita keteiik, Ýill Smit júrgizýshi tarapynan áieline qatysty aitylǵan ázilge ashýlanǵan bolatyn. Alopetsiia aýrýyna shaldyqqan Djada Pinkett-Smit shashy túsip qalǵandyqtan, basyn taqyrlap tastaýǵa májbúr bolǵan.
Smit kinojuldyzdar, rejisserler men prodiýserlerdiń basyn biriktirgen tanymal uiymnan shyǵatyn bolsa, «Oskar» syilyǵyna úmitker filmder men spektaklderge daýys bere almaidy. Alaida onyń jumystary júldege usynylatyn tizimnen shettetilmeidi.
