Úkimettik emes uiymdar qoǵamnyń qýatty kúshine ainaldy. IX Azamattyq forým jumysyn bastap bergen QR Aqparat jáne qoǵamdyq damý ministri Aida Balaeva osylai málim etti, dep habarlaidy QazAqparat.
«Eń aldymen sizderdi 9-shy ret ótkizilip otyrǵan Respýblikalyq Azamattyq forýmnyń ashylý saltanatymen shyn júrekten quttyqtaimyn. Ózderińiz kórip otyrǵandai, bul forým «Qoǵam men memleket: Áriptestik pen damýdyń 30 jylynda birgemiz» dep atalady. Sóz joq, ataýy ózekti, maǵynasy tereń, maqsaty kemel. Olai deitinim, azamattyq qoǵam, quqyqtyq memleket, áleýmettik saiasat - munyń barlyǵy osydan 30 jyl buryn Tuńǵysh Prezidentimiz - Elbasy Nursultan Nazarbaev qazyǵyn qaqqan Táýelsiz elimizdiń egemendik týraly deklaratsiiasynda hattalyp, halyqymyzdyń sanaly túrde tańdap alǵan sara joly, qaitalanbas qundylyqtary. Búgin mine siz ben biz osy qaǵidany is júzinde kórip, nátijesin túiindep otyrmyz», - dedi ministr.
Onyń atap ótýinshe, osy ýaqyt aralyǵynda úkimettik emes uiymdar degen uǵym qalyptasyp qana qoimai, qoǵamnyń qýatty kúshine ainaldy.
«Ony kóp kýálikpen tizbei-aq bir dálelmen atap óteiin. Eger 1990 jyly elimizde resmi tirkelgen ÚEU-lar sany 100-ge jetpei, onyń ne bary 10 shaqtyǵysy ǵana belsendi bolsa, osy kúni olardyń sany 20 myńnan asady. Onyń bes myńnan astamy kúndelikti qoǵam ómirine belsendi aralasyp júrgen uiymdar. Bul, árine, birinshi kezekte Táýelsizdigimizdiń, Elbasynyń jáne Memleket basshysynyń saliqaly saiasatynyń jemisi. Óitkeni, alǵashqy kúnnen bastap búginge deiin memlekettiń azamattyq qoǵam institýttaryn qoldaýy bir sátke de toqtaǵan emes», - dedi ol.
Ministr salany damytýǵa arnalǵan tujyrymdama da, arnaiy zańnama da qabyldanǵanyn atap ótti. Sonyń negizinde jyl saiyn áleýmettik jobalarǵa qarjy bólinip qoldaý kórsetilip otyrǵandyǵyn basa aitty.
«Sońǵy 15 jylda ÚEU-lardyń jobalaryna bólinetin qarajat 200 ese artyp, biyl 25 mlrd teńgeni qurap otyr. Esesine búkil elimiz boiynsha qoǵamnyń san túrli baǵyty boiynsha 10 myńdaǵan joba iske asty. Myńdaǵan uiym ary qarai damýǵa múmkindik alyp, qanshama adam jumyspen qamtyldy. Kórip otyrsyzdar, buryn júie basqasha edi. Úkimet bar máseleni sheshýdi óz moinyna alatyn. Al qazirgi zaman aǵymy bólek. Osynyń ózi sizder siiaqty oi-órisi eren tulǵalar men qyzmeti belsendi uiymdardyń arqasy», - dedi Aida Balaeva.
