Ulttyq ekonomika ministrligi ekologiialyq tólemderden túsetin qarajatty 100 paiyz ekologiialyq máselelerge baǵyttaý bastamasyn qoldady, dep habarlaidy QazAqparat.
Aita ketsek, Parlament Májilisinde Ekologiia, geologiia jáne tabiǵi resýrstar ministri Maǵzum Myrzaǵaliev QR keibir zańnamalyq aktilerine ekologiia máseleleri boiynsha ózgerister men tolyqtyrýlar engizý týraly zań jobasyn qorǵaǵan bolatyn.
Zań jobasyn talqylaý barysynda depýtat Taras Qitýov Ulttyq ekonomika vitse-ministri Ermek Alpysovqa suraq qoidy.
«Ekologiialyq kodeks jobasynda ekologiialyq tólemderdi óńirlerdiń jergilikti ekologiialyq qajettigine 100 paiyz baǵyttaý týraly normalar bar. Aityńyzshy, bul másele boiynsha sizdiń ustanymyńyz qandai?» - dedi Taras Qitýov.
Bul suraqqa jaýap bergen Ermek Alpysov jalpy bul tetikti Ulttyq ekonomika ministrligi qoldaitynyn málim etti.
«Jergilikti biýdjetke túsetin ekologiialyq tólemder jergilikti problemalardy sheshý máselesine baǵyttalýy kerek. Aldyn ala biýdjettik kodekske silteme retinde ekologiia kodeksinde bul másele qarastyrylatyny jazylǵan», - dedi ol.
Ermek Alpysovtyń bul sózine Parlamet Májilisiniń tóraǵasy Nurlan Nyǵmatýlin qoldaý bildirdi.
«Durys. Bul óte mańyzdy sharýa. Az bolsa da, kóp bolsa da ekologiialyq tólemder jergilikti biýdjetke túsedi. Al odan keiin ol aqsha qaida, qandai maqsatqa jumsaldy – ony bir Qudai biledi. Jasyratyny joq, sol aqsha ekologiiadan tys basqa jaǵdaiǵa jumsalatyny bar. Solai emes pe? Endi osy zań jobasyna sáikes ekologiialyq tólemder tek qorshaǵan ortany qorǵaý sharalaryna jumsalatyn bolady. Bul óte durys ári qajetti dep oilaimyn. Sondyqtan bul normany qoldaimyz», - dedi Nurlan Nyǵmatýlin.
