Úkimet otyrysynda Ulttyq ekonomika ministrliginiń Salyq jáne keden saiasaty departamentiniń direktory Azamat Ámrin aktsizdiń kóterilýine bailanysty Qazaqstanda benzin qanshalyqty qymbattaitynyn aitty, – dep habarlaidy «Ult aqparat».
«Qazirgi tańda benzin baǵasynyń aktsizi 8 teńge, benziniń litri 150 teńge bolyp tur. Biz aktsiz stavkasyn 10 500 teńgeden 24 435 teńgege arttyrdyq. Osydan baryp, benzin litri 10 teńgege kóteriledi. Iaǵni, aktsiz 8-den 18 teńgege kóterildi. Osylaisha, baǵa shamamen 8 paiyzǵa – 150-teńgeden 160 teńgege kóteriledi. Biraq, bul rette aktsizdiń baǵany retteýshi jalǵyz faktor emes ekenin eskerý kerek» dedi Azamat Ámrin.
Ol naryqtyq ekonomika jaǵdaiynda suranys pen usynystyń bar ekenin túsindirdi.
«Meniń oiymsha, baǵa tikelei 10 teńgege kóterilmeidi. Máselen, 2015 jyly biz baǵany 4,5 myń teńgeden búgingi 10,5 myń teńgege kótergen bolatynbyz. Al 2015 jyly benzin baǵasy kóterilmedi» dedi spiker.
Alaida bul ózgeristerdiń infliatsiiaǵa áser eteri anyq.
«Biz infliatsiiaǵa yqpal etetin áserdi taldap kórdik. Tutyný baǵalarynyń indeksi taýarlardyń 500 túrimen esepteletinin bilesizder. Olardyń úsheýi AI-93, AI-95, AI-98 benzinderi. Olardyń úlesi - 0,6 paiyzdy quraidy. Osyǵan bailanysty infliatsiiaǵa saiyp kelgende 0,35 paiyzdyq áser bolady. Iaǵni, dál Ulttyq bank boljaǵan 4-6 paiyzdyq deńgeiden aspaidy. Qaýly jobasy memlekettik organdardyń maquldaýyna joldandy. Salalyq memlekettik organdarmen keliskennen keiin sheshim Úkimet otyrysyna jiberiledi. Onda naqty sheshim qabyldanady» dedi ministrlik ókili.
