Ýchaskelik meditsina qyzmetkerlerine KVI aýrýlaryn úide emdegeni úshin 3 bazalyq laýazymdyq jalaqy mólsherinde qosymsha aqy tólenedi. Bul týraly búgin Úkimet otyrysynda QR Densaýlyq saqtaý ministri Ajar Ǵiniiat aitty, dep habarlaidy QazAqparat.
«Ambýlatoriialyq naýqastardyń sanynyń óskenin eskere otyryp, Densaýlyq saqtaý ministrligi óńirlerdiń jergilikti atqarýshy organdarymen birlesip, meditsinalyq-sanitariialyq alǵashqy kómek deńgeiinde ýaqtyly meditsinalyq kómekti nyǵaitý jáne uiymdastyrý boiynsha is-sharalar qabyldaýda», - dedi ol.
Ministrdiń dereginshe, qazirgi ýaqytta elimiz boiynsha 3 054 mobildi dárigerlik brigada jumys isteidi, rezervte 1 622 brigada bar. KVI-men aýyratyn naýqastardy ambýlatoriialyq emdeýge ýchaskelik meditsina qyzmetkerleri keńinen tartylýda.
Shuǵyl meditsinalyq kómekti 1 486 jedel meditsinalyq járdem brigadasy kórsetedi, rezervte 150-i jasaqtalǵan.
Qazir KVI kezinde meditsinalyq kómek kórsetýge barlyǵy 40 myńǵa jýyq meditsina qyzmetkeri tartylǵan.
Rezervte 4 556 meditsinalyq qyzmetker bar, onyń 1217-i - dáriger.
«Meditsinalyq-sanitariialyq alǵashqy kómek uiymdary qyzmetkerleriniń jumysyn yntalandyrý maqsatynda mobildi brigadalardyń qaita shyǵýyn, Mindetti áleýmettik meditsinalyq saqtandyrý arqyly úidegi statsionarlardy keńeitý jáne belsendi ashýǵa qosymsha aqy tóleý boiynsha is-sharalar qabyldandy. Sondai-aq, ýchaskelik meditsina qyzmetkerlerine KVI aýrýlaryn úide emdegen úshin 3 bazalyq laýazymdyq jalaqy mólsherinde qosymsha aqy kózdelgen», - dedi Ajar Ǵiniiat.
