Bilim jáne ǵylym ministri Kúlásh Shámshidinova UBT kezinde alaiaqtarǵa aldanyp qalmaýǵa shaqyrdy, dep habarlaidy Sputnik Qazaqstan tilshisi.
Bilim ministri UBT-nyń suraqtary men jaýaptary zańdy túrde memlekettik qupiianyń qataryna engizilgenin atap ótti.
"Sondyqtan test jaýaptarymen qolǵa túskenderdiń ústinen qylmystyq is qozǵalyp, zań aldynda jaýap beredi", - dedi Shámshidinova úkimette ótken baspasóz máslihatynda.
Onyń aitýynsha, test jaýaptaryn satý múmkin emes, sebebi ol bireýdiń qolynda júretin dúnie emes.
"Halyq saq bolýy kerek, sebebi neshe túrli alaiaqtar bar. Men Nazarbaev ziiatkerlik mektepterinde jumys istegenimdi bilesizder. Sonda bul týraly jylda aitylady: túspei qalsa, qolymnan kelgen joq dep aqshasyn qaitaryp beredi eken, al tússe, men kómektestim deidi eken. Shyn máninde, ol múmkin emes", - deidi ministr.
Shámshidinova test kitapshalary shyǵarylatyn jerlerde 24 saǵat boiy beinebaqylaý kamerasy jumys isteitinin aitty.
"Kamera bir sekýnd ta toqtamaidy. Ol jerge kim baryp, ne alǵanyn biz bilip otyramyz. Eger birdeńe shyǵatyn bolsa, naqty aty-jónin aitamyz. Sondyqtan halyqtyń ózi saq bolýy kerek", - dep eskertti vedomstvo basshysy.
Sondai-aq, ol baspasóz máslixatynda mektep muǵalimderin aǵylshyn tiline úiretýge qatysty pikir bildirdi.
«Negizi, aǵylshyn tili boiynsha úsh ailyq kýrstarǵa qatysqan mektep muǵalimderi taǵy alty ailyq kýrstan ótken bolatyn. Degenmen, biz atalǵan máseleni qaita qarastyryp shyqtyq. Kelesi jyldan bastap muǵalimderdiń aǵylshyn tili boiynsha kásibi biliktiligin arttyrýǵa arnalǵan qarjyny, ol shamamen, 4 milliard teńgeni basqa maqsattarǵa jumsaityn bolamyz. Al aǵylshyn tilinde sabaq beretin muǵalimder tek joǵary oqý oryndar arqyly ǵana daiarlanady. Iá, mektepte tájiribesi bar muǵalim bar, erteń joǵary oqý ornynan keletin jas mamandar bar. Sol sebepti biz qazirgi muǵalimlerdi arnaiy kýrstarǵa jibergen bolatynbyz», - dedi K.Shámshidinova.
Ministrdiń aitýynsha, ximiia, fizika, biologiia men informatikadan sabaq beretin 14 myń muǵalimdi aǵylshyn tili kýrstarynan ótkizý josparlanǵan bolatyn. Osy ýaqytqa deiin 11 myń muǵalim óz kýrstaryn aiaqtady.
«Endi, biz 2019 jyly bastalǵan kýrstardy toqtata almaimyz. Ol daiyndyq jalǵasyp jatyr. Osydan keiin osy saladaǵy mamandardy tek joǵary oqý oryndary arqyly ǵana daiarlaimyz», - dep atap kórsetti K.Shámshidinova.
