Foto: arainfo.kz
Nurǵanat Qanat Ulttyq biryńǵai testileýde eń joǵary – 140 baldyń 140-yn jinap, absoliýtti nátije kórsetti, dep habarlaidy Ult.kz.
Taraz qalasyndaǵy «Bilim-Innovatsiia» litseiiniń túlegi osyndai jetistigi úshin jekemenshik bilim berý ortalyǵynan iri syilyq utyp aldy. Endi ol biznes-klastaǵy páter, Mercedes-Benz E-Class nemese 50 million teńgeniń birin tańdai alady.
Budan bólek, túlekke tórt jyl boiy ai saiyn 140 myń teńge kóleminde shákirtaqy tóleý qarastyrylǵan. Al onyń ata-anasyna 3 million teńge syiaqy beriledi.
Nurǵanattyń aitýynsha, ol daiyndyq kezinde aldyna naqty maqsat qoiǵan.
"Meniń maqsatym – joǵary ball jinaý boldy. Soǵan jettim. Bul – kópjyldyq eńbektiń, ata-anamnyń qoldaýy men ustazdarymnyń seniminiń nátijesi", – dedi ol.
Aita keteiik, Ulttyq testileý ortalyǵy málimetinshe, biyl UBT-ǵa qatysý úshin 240 myńǵa jýyq talapkerden 446 myńnan astam ótinish túsken. Testileý 10 shildege deiin jalǵasady.
