- Úkimettiń búgingi otyrysynda bilim jáne ǵylym ministri Erlan Saǵadiev «Altyn belgi» iegerleri men xalyqaralyq olimpiada jeńimpazdarynyń barlyq oqýshylarmen birge ulttyq biryńǵai testileýge qatysatynyn jetkizdi. Alaida olar úshin bir jeńildik qarastyrylǵan, dep xabarlaidy "Ult aqparat".
Vitse-ministr Elmira Sýxanberdievanyń aitýynsha, ulttyq biryńǵai testileý kezinde «Altyn belgi» iegeri qatardaǵy mektep oqýshysymen teń upai jinasa, memlekettik grant dárejesi joǵary túlekke beriledi.
«Iá, jeńildik tek qatarlaspen teń upai alǵan jaǵdaida ǵana beriledi. Máselen, eger «Altyn belgi» iegeri men tórt-beske oqyǵan bala birdei upai sanyn jinasa, onda memlekettik grant «Altyn belgi» iegerine tapsyrylady. Degenmen, ondai jaǵdailar az. Sebebi «Altyn belgi» iegerleri óz dárejesine sai bilimdi kórsetýge tyrysýy qajet», - deidi E.Sýxanberdieva.
Aita keteiik, kelesi jyldan bastap túlekter mektep attestatyn alý úshin bólek emtixan tapsyrady. Al joǵary oqý ornyna túsý úshin biryńǵai ulttyq testileýdi tapsyrý qajet. UBT-da «Altyn belgi» ataǵyn dáleldeýdiń qajeti joq. Ony mektepterdiń ózderi rastaidy. UBT-nyń jańa formatyn talqylaý barysynda «Altyn belgi» iegerlerin testileýden múldem bosatý týraly usynys bolǵan. Alaida ministrlik ony qoldaǵan joq.
.jpeg)