Ulttyq testileý ortalyǵynyń direktory Ramazan Álimqulov 2018 jyly Ulttyq biryńǵai testileýdiń qalai ótetinin aityp berdi, dep habarlaidy QazAqparat tilshisi.
Ortalyq basshysynyń aitýynsha, UBT formaty ózgermeidi jáne test tapsyrmalarynyń bazasy 50%-ǵa jańartylǵan.
«Biylǵy UBT ótken jylǵydai bes pán boiynsha: úsh mindetti jáne eki tańdaý páni boiynsha ótedi. Mindetti pánder arasynda matematikalyq saýattylyq, oqý saýattylyǵy jáne Qazaqstan tarihy pánderi bar.
Test tapsyrmalarynyń bazasy 50%-ǵa jańartyldy. 2017 jyly bizde 80 000 test tapsyrmalary bolsa, biyl olardyń sany 120 myńnan asady.
Onyń shamamen 11%-y fýnktsionaldy saýattylyǵyn anyqtaýǵa baǵyttalsa, shamamen 37% test tapsyrmalarynyń bir nemese birneshe durys jaýaby bar. Bul óz pánin tereńirek túsinýge jáne qur jattap qana qoimai, oilanýǵa múmkindik beredi», - dedi Ramazan Álimqulov QR BǴM alqasynyń keńeitilgen otyrysy aiasynda jýrnalisterge bergen suhbatynda.
Sondai-aq, Ramazan Álimqulov jańa UBT-da Qazaqstannyń tanymal tulǵalary týraly suraqtardyń bolmaitynyn atap ótip, UBT tapsyrý jaǵdaiyn jaqsartý boiynsha ózgerister engenin habarlady.
«Burynǵy ereje boiynsha mektep túlegi belgili bir sebeptermen testileýge qatysa almasa, kelesi jylǵa qaldyrylatyn. 2018 jyly belgili bir sebeptermen testileýge qatysa almaǵan oqýshynyń qabyldaý komissiiasynyń ruqsatymen óz aimaǵyndaǵy kelesi lekpen tapsyra alýy úshin jumys istep jatyrmyz», - dedi R. Álimqulov.
