21 maýsym men 5 shilde kúnderi Qazaqstannyń barlyq mektepterinde Ulttyq biryńǵai testileý ótedi, dep habarlaidy QazAqparat.
Biylǵy testileýdiń ereksheligi - sanitarlyq talaptardyń kúsheitilýi bolmaq. Ǵimaratqa kirerde test tapsyrýshylar arasynda eki metrlik araqashyqtyqty qatań saqtaý men maskaly rejim júzege asyrylady. Talapkerler dezinfektsiialaýdyń 5 túrli kezeńinen ótedi. UBT ótkiziletin barlyq oryndar teplovizormen, dezinfektsiialyq tonnelmen, aiaq kiimdi zararsyzdandyrýǵa arnalǵan kilemshemen, meditsinalyq beketpen, sanitaizermen jáne qorǵanys maskalarymen qamtamasyz etiledi.
Biylǵy testileýge qatysýǵa rekordtyq kólemde - 131 755 ótinish qabyldanǵan.
Alǵashqy kúni UBT-ny 6 512 myń adam tapsyrady. Bir aýditoriiada orta eseppen 18 adam ǵana bolady. Osylaisha, aýditoriia tek 35% deiin toltyrylady. UBT tapsyrý úshin túlekterden PTR-testileýden ótkeni týraly esh anyqtama talap etilmeidi. Talapkerler tek maska taǵyp kelýi tiis.
Sonymen birge, UBT ótkizetin ár pýnktte kezekshi aýditoriia bolady. Koronavirýs infektsiiasyn juqtyrǵan balalar sol kabinette, jalpy aýditoriiadan bólek test tapsyra alady.
Jalpy, Ulttyq biryńǵai testileýdi ótkizý tártibi burynǵy formatta qaldy. Budan bylai talapkerlerge kalkýliator beriletin bolady. Sonymen qatar testileý ýaqyty da birshama uzartyldy. Ata-analar men túlekterdiń suraýymen testileý ýaqyty taǵy 10 minýtqa uzaryp, UBT 4 saǵat ótetin boldy. Ǵimaratqa kirgizý barysynda jáne aýditoriiada tyiym salynǵan zatpen ustalǵan túlek testileýge jiberilmeidi jáne biyl UBT tapsyrý múmkindiginen airylady.
Karantin sharalaryna bailanysty taǵy bir eskerer jait, ata-analarǵa jáne túlekterdi alyp júrýshi basqa adamdarǵa balalardy UBT ótkizý pýnktterinde kútýge tyiym salynady. Ata-analar UBT ótý barysyn úiinde otyryp, onlain kóre alady. Bul úshin árbir aýditoriiadan transliatsiia qamtamasyz etiledi. Test tapsyrý ótetin ǵimarat aýmaǵyn quqyq qorǵaý organdary kúzetedi. Osy oraida, onlain kórsetilim siltemeleri men resýrstar Ulttyq testileý ortalyǵynyń saitynda ári áleýmettik jelilerde jariialanatyna ýáde etilgen bolatyn.
Barlyq beinejazbalarǵa 25 tamyzǵa deiin taldaý júrgiziledi. UBT ótkizý qaǵidalarynyń buzylýy anyqtalǵan jaǵdaida, iaǵni kóshirý nemese basqa da áreketter baiqalsa, testileý nátijeleri joiylady. Sonymen qatar, bilim berý grantyn taǵaiyndaý konkýrsynyń nátijeleri de joiylýy múmkin.
UBT-dan keiin bilim grantyn taǵaiyndaý konkýrsyna qatysý úshin nemese aqyly negizde bilim alý baǵytynda ulttyq joǵary oqý oryndaryna keminde 65 ball, al basqa joǵary nemese joǵary oqý ornynan keiingi bilim uiymdaryna keminde 50 ball jinaý kerek.
Oǵan qosa, «Aýyl sharýashylyǵy jáne bioresýrstar», «Veterinariia» bilim salalary boiynsha keminde 60 ball, «Pedagogika ǵylymdary» salasy boiynsha keminde 70 ball bolýy tiis. Al «Densaýlyq saqtaý jáne áleýmettik qamtamasyz etý (meditsina)» salasyna kem degende 65 ball qajet.
