Almaty men Astana ákimdikteriniń baspasóz qyzmeti ýchaskelik politseilerdi páterge kirgizbeý jarlyǵy týraly qaýesetti joqqa shyǵardy, - dep habarlaidy "Ult aqparat" kaz.tengrinews.kz portalyna silteme jasap.
Áleýmettik jeliler men WhatsApp messendjeri arqyly ýaqytsha tirkeýdi tekserip kelgen ýchaskelik politseidi kirgizbeý týraly ákimniń jarlyǵy bary týraly habarlama taralyp jatyr. Mátinde munyń naqty qai qalada ekeni jáne mundai buiryq bergen qai ákim ekeni kórsetilmegen.
"Kesh jaryq! Keshe ákim jarlyq shyǵardy: turǵyndardyń tirkelýin tekserip kelgen adamdarǵa esik ashpańyzdar, ol adamdar forma kigen bolsa da úige kirgizbeýge quqyńyz bar. Jarlyq azamattardy tirkeýge bailanysty týyndaǵan jaǵdaidy qylmyskerler paidalanyp ketpeýi úshin shyǵaryldy. Úidegilerińizge eskertip qoiyńyzdar!", - delingen habarlama mátininde.
Almaty ákimdiginiń baspasóz qyzmetindegiler munyń jalǵan ekendigin aitty.
"Bul jalǵan. Mundai jarlyq bolǵan joq", - deidi baspasóz qyzmetiniń ókilderi.
Astana ákiminiń keńesshisi Qaisar Jumabaiuly da bul qaýesetti joqqa shyǵardy.
"Ákimnen eshqandai habarlama taratylǵan joq. Adamdar shatastyryp alǵan bolar. Mundai habarlama taratqan joqpyz jáne muny rastamaimyz dep naqty aitamyn", - dedi Qaisar Jumabaiuly.
