MMA-da óner kórsetip júrgen qazaqstandyq Qýat "Naiman" Hamitov ýaqytsha tirkeý boiynsha jańa erejelerge narazylyǵyn bildirdi. Sportshy Qazaqstan turǵyndarynyń óz elinde júrip-turýyna nelikten aqy tóleý kerektigin túsinbeitinin jetkizdi. Osylai dei kele Hamitov "tirkeý máselesimen" keletin adam bolsa, ony "jerlep tastaitynyn" aitty, - dep habarlaidy "Ult aqparat" kaz.tengrinews.kz portalyna silteme jasap.
"Bizdiń elde sheshilmegen máselelerdi tizbektei bersem meniń, tipti dostarymnyń saýsaǵy jetpeidi. Aýyldar quryp barady, barlyq jerde jumyssyzdyq, jumys oryndary qysqaryp jatyr. Azyq-túlik, kommýnaldy qyzmet, báriniń baǵysy sharyqtap barady! Baiǵus zeinetker tizginde otyryp, kameraǵa túsip qalyp, aiyppul tólese, bir ai ash otyrýy kerek. Almatydan 100 shaqyrym assa bolǵany, basqa ómir bastalady, joldar 45 jyldan beri jóndeý kórmegen. Jastar ishkish bolyp barady, adam óltirý men tonaý kóbeidi. Barlyǵy ashtan ólmes úshin qalaǵa barady! endi ol adamdar óz elinde bir jerge barǵany úshin aqsha tóleýi kerek pe??? Ant etemin, maǵan bireý tirkeý máselesimen keletin bolsa, ony sol jerde kómip tastaimyn! Qazaqstan munai, gaz, altyn, kúmis, ýran, qol, aliýmínii, kómir jáne taǵy sol siiaqtylardan álemde bestikke kiredi. Halyq onsyz da olardy kórip otyrǵan joq! Endi osydan keiin halyqty AEK-terińmen tonamaqsyńdar ma??? "Alǵa Qazaqstan" dep aiǵailai bergen patriot emes, óz halqynyń muńyn túsine bilgen adam. Elimizde qiyndyqtar jetip artylady, al olar bolsa AEK zańyn oilap taýypty", - dep jazypty sportshy Instagram jelisindegi paraqshasynda.
Qýat Hamitov grek-rim kúresinen Qazaqstannyń sport sheberi, APFC uiymynyń (Qazaqstan) jáne WBK uiymynyń (Qytai) chempiony. 28 jastaǵy Hamitovtyń kásipqoi ringtegi rekordy 25 jekpe-jek, onyń 20-da jeńiske jetip, tórteýinde utylǵan, taǵy bir jekpe-jeginde teń túsken.
